Verbod op perlemoen opgehef
2009-12-07 07:24
Rajaa Azzakani
Hermanus - Pres. Jacob Zuma het gister sy belofte aan die vissersgemeenskap hier gestand gedoen toe die regering die verbod op perlemoenduik “voorwaardelik” opgehef het.
Dit beteken egter nie dat vissers onmiddellik perlemoen mag duik nie, maar bloot dat oorlegpleging hieroor geopen word.
Volgens die algehele verbod, wat begin verlede jaar teen stropery ingestel is, is die regering verbied om selfs in konsultasie met dié gemeenskap te tree.
Tina Joemat-Pettersson, minister van landbou, bosbou en visserye, het terselfdertyd gesê sy sal in die eerste week van Februarie aanstaande jaar kwotas vir die totale toelaatbare vangs bekend maak.
Sy het gewaarsku dat stropery onmiddellik stopgesit moet word.
“Die verbod werk nie. Stropery is buite beheer. Hoe vinniger julle ophou stroop, hoe groter sal die kwota wees wat ek kan toestaan.”
Die ministeries van polisie, justisie, intelligensie en arbeid sal ’n geïntegreerde plan teen stropery saamstel.
Sestig veterane van Umkhonto we Sizwe (MK) en Apla is opgelei om met die bestryding van stropery langs die kus te help.
Membathisi Mdladlana, minister van arbeid en hoof van die provinsiale ANC-taakspan, dr. Franklin Sonn, tussentydse provinsiale ANC-onderleier, sakeman en oud-ambassadeur, en Tony Ehrenreich, provinsiale sekretaris van Cosatu, was ook teenwoordig by die vergadering in Zwelihle, Hermanus.
Zuma het bykans twee maande gelede dié gemeenskappe van Hawston, Hermanus, Arniston, Struisbaai, Gansbaai en die Weskus besoek om na hul klagtes te luister. Hy het terugvoering binne ’n maand belowe.
Hy het gister gesê die land se hulpbronne moet tot voordeel van al die mense strek.
“Almal mag miskien nie dieselfde hoeveelheid kry nie, maar dit is belangrik dat almal iets kry,” het Zuma gesê, waarop hy luid toegejuig is deur die skare van sowat 300 mense in die Zwelihle-gemeenskapsaal.
Die president het verder gesê dat Joemat-Pettersson na die belange van bestaansvissers sal omsien, nadat daar vroeër verwarring hieroor was.
Dié meevaller het nie almal se goedkeuring weggedra nie. Mnr. Naseegh Jaffer van die nie-regeringsorganisasie Masifundise, wat vir bestaansvissers se regte baklei, voel die regering raak net ’n klein deel van die groter probleem aan.
“Daar word niks gesê oor die regte van vissers wat ’n bestaan maak uit lynvis en kreef nie. Perlemoenvissers maak net ’n klein deel uit van die groter bedryf.”
Met verwysing na die R308 miljoen in die alternatiewe bestaansregfonds, het Joemat-Pettersson gesê R6,8 miljoen is reeds aan dié gemeenskap uitbetaal.
“Ons sal na die bakkieboys, die duikers en die wetlike entiteite gaan en die uitstaande bedrag sal voor Kersfees aan julle uitbetaal word.”
Die regering het ’n verdere R30 miljoen beskikbaar gestel vir die mariene en akwakultuurnavorsingsentrum vir die Overberg. Hulle wil ’n akwakultuurplaas en staatskwekery in Hawston begin. “Dit sal werk vir ons mense verskaf en die grondkwessie oplos.”
- Die Burger