Verblyf in luukse-oord vir WB net ’n droom
2010-04-26 07:24
Marietjie Gericke, Volksblad
Bloemfontein - Luukse-Verblyf in die Philip Sanders-oord buite Bloemfontein wat vir die Wêreldbeker-sokkertoernooi reeds vir meer as R100 miljoen opgeknap is, het nou nét ’n droom geword.
Dié oord staan steeds toegegroei deur bossies en vullis nadat meer as R100 miljoen bestee is om daarvan vyfster-verblyf vir die Wêreldbeker-sokkertoernooi te maak.
Van die kontrakteurs/konsultante wat verlede jaar van die terrein weg is omdat hulle nie betaal is nie, sê dat hulle steeds op hul geld wag.
Dié toernooi is nou minder as 50 dae weg, maar drie maande se werk is nog oor om die projek te voltooi, verneem Volksblad betroubaar. Om personeel weer op die terrein te kry sal minstens twee weke neem nadat hulle betaal is.
Geen werknemer is egter weer op die terrein bespeur om die projek te voltooi nie, hoewel die Vrystaatse regering beloof het die projek gaan nog betyds vir die toernooi voltooi word. Die nuwe geldjaar vir die provinsie het reeds aangebreek.
Volksblad verneem sowat R30?miljoen se werk is nog oor. “Om die projek te voltooi voor die toernooi, is nou net ’n droom wat nie meer haalbaar is nie,” sê betroubare ingeligtes.
Van die kontrakteurs/konsulante kla steeds teenoor Volksblad dat hulle nog nie betaal is nie, nadat die projek se geld in verlede jaar opgeraak het en die opknappingswerk tydelik gestaak moes word.
Roy Jankielsohn, leier van die DA in die Vrystaat, sê dit is kommerwekkkend dat met minder as 50 dae oor voor die toernooi, daar nog geen verandering is wat betref die werk aan die oord nie.
Daar is ook bewerings dat items by die oord voete kry en dat kontrakteurs steeds nie betaal is nie.
Die departement van ekonomiese ontwikkeling, toerisme- en omgewingsake se beloftes om die oord voor die sokkertoernooi te voltooi, het nog geen vrugte afgewerp nie.
Jankielsohn sê: “Die Mangaung-munisipaliteit het aangedui dat hy ’n tekort het aan verblyf vir die sokkertoernooi en die provinsiale regering het die geleentheid verbeur om die oord op groot skaal te bemark nadat R150 miljoen se verbeterings aangebring is.”
Miriam Mochologi, adjunk-direkteur: kommunikasiedienste van die departement ekonomiese ontwikkeling, toerisme- en omgewingsake, sê altesaam R3 miljoen is op 31 Maart vanjaar aan kontrakteurs uitbetaal. Hulle is besig om die uitstaande balans te verwerk om dit te kan betaal.
Sy sê net die watertoevoer moet nog voltooi word voordat gaste hier kan bly. Dit sal nie drie maande neem om te voltooi nie. Die ander kleiner werk kan volgens haar later voltooi word. Verder sê Mochologi die departement van ekonomiese ontwikkeling, toerisme- en omgewingsake en die departement van openbare werke en landelike ontwikkeling oorweeg nou die voorstelle van diensverskaffers oor hoe om die oord te bestuur. Geen besluit is nog hieroor geneem nie.