'Verander ANC-leierskap' – Malema
2012-01-13 12:45
Johannesburg – Julius Malema, geskorste leier van die ANC-jeugliga (ANCYL), sê die leierskap in die regerende party moet verander, het koerante berig.
Hy het ‘n beroep op lede van die African National Congress gedoen om die party “terug te eis” tydens die ANC se verkiesingsvergadering in Desember in Mangaung, het The Star Vrydag berig.
“Kom ons maak gereed. Ons gaan vir ‘n geveg. Ons gaan na Mangaung,” het die koerant hom aangehaal toe hy Donderdag die Ephraim Mogale-gedenklesing in Moutse, Limpopo, gelewer het.
“Ons gaan die ANC terug eis... om dit só te posisioneer dat dit die volgende honderd jaar sal oorleef.”
Malema het gesê die ANC het vir ‘n honderd jaar oorleef omdat dit in robuuste debatte deelgeneem en kritiek toegelaat het.
“Vandag word diegene wat ‘n verskillende mening het, opsygestoot... Dissipline in die ANC was nooit gebruik om ‘n verskillende mening te onderdruk nie,” het hy gesê.
“As daar ‘n leierskap is wat bang is vir nuwe menings, nuwe idees; daardie leierskap sal die ANC dood maak.”
Malema is in die proses om teen sy vyf jaar lange skorsing te appelleer.
Hy is skuldig bevind op aanklag dat hy verdeeldheid in die ANC saai en die party in oneer bring.
Malema is egter onskuldig bevind op aanklag van rassisme oor uitlatings wat hy in Mei 2011 op 'n saamtrek gemaak het.
The Times berig dat Malema ook die lesing gebruik het om pres. Jacob Zuma te kritiseer. Hy het Zuma se besluit om vyf departemente in Limpopo onder nasionale administrasie te plaas, gekritiseer.
Volg Nuus24 op Twitter
- SAPA