Ventersdorp-boer aangeval op plaas
2010-04-18 11:20
Johannesburg - 'n Boer (50) van die Noordwes is in 'n ernstige toestand nadat hy op sy plaas in Ventersdorp aangeval is, het paramedici Sondag gesê.
Paramedici is 05:00 Sondagoggend na die toneel ontbied en het die man behandel vir verskeie steekwonde aan sy been, het Werner Vermaak, ER24-woordvoerder in 'n verklaring gesê.
Die man het ook 'n fraktuur aan sy bobeen en ander wonde opgedoen. Hy is per lugvervoer na die Milpark-hospitaal in Johannesburg geneem.
"Die man het glo geraas buite sy huis gehoor toe sy honde begin blaf het. Toe hy gaan ondersoek instel, het drie onbekende verdagtes hom oorrompel en na bewering aangerand."
Die man se vrou en dogter het in 'n ander kamer weggekruip ten tyde van die voorval en word behandel vir skok.
Polisiewoordvoerder lt.kol. Lesego Metsi het gesê hulle het op die toneel aangekom soos wat die man na die hospitaal gevlieg is.
"Die verdagtes het ook probeer om die man se voertuig te steel. Die buurman het hulle egter gesien, 'n paar skote gevuur en toe hardloop hulle weg."
Die aanvallers is nog op vrye voet. Die polisie ondersoek die voorval.
- Sapa