Veldbrande in VS eis reeds een lewe
2011-08-25 09:00
Bloemfontein - Verwoestende veldbrande wat in die Vrystaat woed, het reeds een lewe geëis, talle mense beseer, duisende stuks vee doodgebrand en honderdduisende hektaar weiveld in meer as tien distrikte vernietig.
Tientalle dorpe se plaasgebiede het erg deurgeloop en boere het vertel “van alle hel wat losgebars het”.
Maryke Swart berig op Steynsrus het altesaam 11 000 ha weiveld, ses pakhuise, ’n onbewoonde huis, 300 bale voer, 24 beeste en sowat nog 1 000 hektaar grond van nuwelingboere in die slag gebly.
In die Vredefort-omgewing, waar ’n gesin van Welkom te voet vir die vlamme moes vlug toe hul motor se bande weens die hitte begin smelt het, is sowat 200 000 ha weiveld afgebrand.
Op Bultfontein is twee seuntjies in hegtenis geneem wat glo as deel van ’n bende van nege op twee geleenthede brande by die dorp gestig het.
’n Ma en dogter wat van Welkom na die Vaaldriehoek onderweg was, is erg deur brande buite Vredefort beseer.
Hulle is albei in die Pelonomi-hospitaal in Bloemfontein.
Christian Claassens (67) en haar dogter, Carina (41), word in die hoësorgeenheid van die brandwondeenheid behandel.
Prof. Sampie Smit van dié hospitaal het Woensdag aan Volksblad gesê hulle het baie seergekry met elk tussen 45% en 50% brandwonde en skade aan hul longe en stembande weens rookinaseming.
Claassens se kleinseun, Adriaan (6), word in die pediatriese afdeling van die hospitaal vir minder ernstige beserings behandel.
Claassens se seun, Nico Claassens van Polokwane, sê volgens inligting is sy ma, suster en Adriaan se sig moontlik deur ’n rookwolk versper.
Hulle het vermoedelik omgedraai, maar is oorval. Die motor se bande het begin smelt en hulle het uitgeklim en van die vlamme probeer weghardloop.
Claassens se ander dogter, Wilna Coetzer, het hulle Woensdag in die hospitaal besoek. Sy sê hulle het veelvuldige brandwonde opgedoen, haar suster kan nie praat nie en hulle is erg geswel.
Geelbooi Nkhi van die plaas Welgerust van Johan Chambers, is saam met hulle in die hospitaal opgeneem, maar is Dinsdagaand daar dood.
Hy is deur die vlamme oorval toe hy saam met die spanne die brand buite Vredefort probeer blus het.
At Venter van die brandbestrydingsafdeling op Bultfontein sê hulle het die afgelope week sewe groot brande in die distrik geblus. Dinsdag het spanne met meer as 40 bakkies van Bultfontein, Soutpan, Brandfort en Theunissen teen ’n brand geveg wat oor ’n afstand van 12 km by 2 km gewoed het.
Die brand is begin toe iemand op ’n plaas in die sterk wind van meer as 60 km/h met ’n hoekslyper gewerk en die vonke die veld aan die brand gesteek het.
Vrystaat Landbou en Rampbestuur in die Noord-Vrystaat kon gister nog nie ’n finale beraming van die skade gee nie.
Talle karkasse van verbrande diere is op onder meer die plaas van Pik Schultz by Vredefort gekry.
Die Nasionale Raad van Dierebeskermingsverenigings (NDBV) het ook Woensdag ingegryp waar diere in die Vrystaat en Noordwes deur die uitgebreide veldbrande vasgekeer en beseer is.
Kaydene Jordaan berig meer as 90 000 ha weiding het vandeesmaand in veldbrande afgebrand. Dit is aansienlik minder as verlede jaar (474 180 ha).
Jan van Rensburg (38), voorman op ’n plaas by Vryburg, is Dinsdag in die Mediclinic Bloemfontein met ernstige brandwonde opgeneem.
Van Rensburg het 55% derdegraadse wonde in die veldbrande opgedoen. Hy is in ’n kritieke, maar stabiele toestand in die hoësorg-eenheid.
Volg Nuus24 op Twitter.
- Volksblad
