Veldbrand saai verwoesting
2011-09-01 09:11
Kimberley – ’n Veldbrand buite die stad, wat vermoedelik deur kwaaddoeners begin is, het sowat 5000 ha weiveld op plase en in die Dronfield-natuurreservaat vernietig.
Dié brand, wat by die Riverton-stasie sowat 25 km buite Kimberley begin het, is deur ’n sterk wind deur die lang, droë gras gedryf. Dit het vinnig na vyf plase langs die N12 versprei.
Kobie Jonker van die plaas Jonkershoek sê hulle kon hul rooi brahmane net betyds na veiligheid bring.
Sowat 650 ha van die 800 ha weiveld op Jonkershoek is vernietig. “As dit nie vinnig reën nie, gaan dinge vererger.”
Jonker sê verskeie mense, selfs onbekendes, het op die plaas opgedaag en gehelp om teen die vlamme te veg.
Charles Hall, bestuurder van De Beers se Dronfield-natuurreservaat, het gesê dit is te vroeg om te sê wat die skade in die reservaat is.
“Sover het ons gelukkig nog nie op enige dooie diere afgekom nie. So ’n brand is altyd gevaarlik vir ons omdat ons baie eksotiese diere het. Die wind het die brand vinnig aangejaag en dit was moeilik om by te bly.”
Die brand is sowat 21:30 onder beheer gekry, maar het twee uur daarna weer begin.
Volgens Jeremy Bezuidenhoudt, voorsitter van die Kimberley-Noord-boerevereniging, het boere en mense met sowat 100 bakkies van 12:00 tot 22:00 gespook om die brand te blus.
“Ons vermoed dit is brandstigting. Ooggetuies het gesien hoe twee mense in ’n wit bakkie die plek verlaat waar die brand begin het. Toe hulle weg is, was vlamme sigbaar. Ons weet egter nie wie die mense is nie.”
Hy sê die meeste van die boere wie se weiveld in die slag gebly het, is ongelukkig nie lede van die boerevereniging nie. Vyf plase het deurgeloop.
“Ons het dié mense al telkemale gevra om deel te wees. Ons het hulle ook laas gesê ons gaan nie meer hulle brande blus nie, maar wat kan ons doen? Ons is mense en kan nie sit en kyk hoe die veld afbrand nie.”
Volg Nuus24 op Twitter.
- Volksblad