Veiligheidswag se rug gebreek tydens rooftog
2010-01-25 08:28
Middelburg. – ’n Veiligheidswag se rug is gister gebreek toe transitorowers wat hulle as werknemers van G4 Security voorgedoen het, ’n geldwa met springstof oopgeblaas het.
Mnre. Zitha Nkosi en James Mkhwanazi van dieselfde maatskappy het gister geld by die Ridge Casino in Emalahleni (Witbank) gaan haal, het kapt. Leonard Hlathi, woordvoerder van die eenheid teen georganiseerde misdaad, gesê.
Omstreeks 12:30 het ’n groen Kia en ’n wit Corsa-bakkie, met magnetiese G4 Security-kentekens, hul geldwa genader waar die N4 en die N12 bymekaar aansluit.
Die vier insittendes van die twee voertuie het vir die wagte gewys om stil te hou, het Hlathi gesê.
“Die rowers het G4 Security-identiteitskaarte aan die wagte gewys. Die wagte het gestop en is gedwing om uit die transito-voertuig te klim.”
Die rowers het toe glo met R5-gewere op die wagte geskiet, maar geen patroondoppies kon op die toneel gevind word nie.
Die transitovoertuig se deur is toe met springstof oopgeblaas, het Hlathi gesê.
Met die slag van die ontploffing is Nkosi sy rug gebreek.
Die rowers het vermoedelik met drie sakke met ’n onbekende bedrag geld op die vlug geslaan.
- Beeld