Veiligheid in staatshospitale onder skoot
2011-02-23 08:52
Bloemfontein - Die swak veiligheid vir personeel in Vrystaatse staatshospitale het Dinsdag op die provinsiale verplegingsberaad in Bloemfontein onder skoot gekom.
Hierop is van die provinsiale gesondheidshoof verneem dat hospitaalveiligheid reeds met gevorderde toerusting opgeskerp word.
“Daar is nie voldoende veiligheidspersoneel om hospitaalpersoneel te beskerm nie, veral saans,” het Motselisi Mabandla, voorsitter van die verpleegsterbestuurdersforum in die provinsie en hoof van verpleegkunde van die Universitas-hospitaal in Bloemfontein, gesê.
Ter reaksie het dr. Sipho Kabane, Vrystaatse gesondheidshoof, gesê ’n besluit is geneem om veiligheid in provinsiale gesondheidsfasiliteite op te skerp deur onder meer van toestelle soos alarms en kameras en meer veiligheidsdienste gebruik te maak.
Daar is al hiermee begin.
Kabane sê dit is nie net die departement se verantwoordelikheid om mense se veiligheid te verseker nie, want misdaad is ’n nasionale uitdaging.
Mabandla was een van die sprekers op die beraad wat deur die Vrystaatse LUR vir gesondheid, Fezi Ngubentombi, en Kabane bygewoon is.
Mabandla sê verpleegsters in staatshospitale en -klinieke het soms nie die nodige hulpbronne om hul werk te doen nie en word dikwels met die pligte van onder meer sekretaresses en portiere belas.
Volgens haar bestaan ’n tekort aan hulpbronne soos toerusting en instrumente.
Sy sê sekretaresses en portiere word nie as kritieke betrekkings beskou nie.
Gevolglik moet verpleegsters dié pligte uitvoer en word hulle van hul eie werk weerhou.
Mabandla het ook gekap na agentskapverpleegsters wat volgens haar nie toegewyd is nie.
Sy sê hulle sal byvoorbeeld vir nagskof opdaag en besef dit is nie maklik om in ’n spesifieke saal te werk nie. Die volgende aand daag hulle dan eenvoudig nie vir werk op nie.
“Wanneer konflik tussen haar (’n agentskapverpleegster) en ander verpleegsters of die suster bestaan, kan eersgenoemde haar sak vat en wegloop.”
Mabandla sê onetiese gedrag, soos om voor pasiënte te stry, is ’n algmene probleem onder verpleegsters.
Sy sê baie verpleegsters is weens die geweldige werklading uitgebrand.
Mabandla het agterná aan Volksblad gesê die opleiding van nuwe verpleegsters is bitter belangrik, want baie van die ouer geslag gaan binnekort aftree. “Ons het jong bloed nodig.”
Sy en haar kollegas soek egter nie mense wat net verpleegkunde studeer omdat hulle nie universiteitsvrystelling gekry het nie, maar passievolle voornemende verpleegsters.
“Ons soek mense wat lief is vir die verplegingsberoep.”
Wat die opleiding van verpleegsters betref, bestaan daar volgens haar ook uitdagings.
Mabandla sê sommige spesialiskursusse vir verpleegsters word nie in die provinsie aangebied nie.
Verder kry voornemende verpleegsters by die kolleges onderrig met ou toerusting, maar by hospitale is tegnologies gevorderde instrumente.
Volgens Mabandla moet verpleegsters nuwe en ou toerusting, wat dikwels op die platteland voorkom, kan gebruik.
Ngubentombi sê die doel van die beraad is onder meer om maatstawwe en strategieë te vestig om uitdagings te pak.
Volgens haar kry diegene wat direk deur probleme geraak word, geleentheid om hul menings te lug.
Dié beraad wat tot vandag duur, is ook ter voorbereiding vir die nasionale beraad wat vroeg in April in Pretoria plaasvind.
- Volksblad