Vavi ontken bewerings oor korrupsie
2013-02-28 13:22
Johannesburg – Zwelinzima Vavi, sekretaris-generaal van Cosatu, het Donderdag in antwoord op bewerings wat deur Eyewitness News gepubliseer is, ontken dat hy betrokke was by enige finansiële ongerymdhede.
"Ek sal nooit die mag wat ek het as sekretaris-generaal van die federasie, gebruik om van die lede van die federasie, wat 'n daaglikse stryd teen korrupsie stry, te steel nie," het hy gesê.
Patrick Craven, woordvoerder van Cosatu, wou nie Woensdag kommentaar lewer op die berig nie.
"Ek kan nie kommentaar lewer nie. Dit is alles gebaseer op anonieme bronne. Ons het 'n staande beleid dat ons nie kommentaar lewer op sulke stories nie."
Craven het gesê die kwessie sal Donderdag by 'n mediakonferensie genoem word.
Mail & Guardian se webwerf het Woensdag berig dat Vavi ondersoek sal word vir 'n aantal bewerings, insluitend finansiële wandade wat verband hou met Cosatu se nuwe gebou in Braamfontein, Johannesburg.
Vavi het ook na bewering met opposisiepartye, insluitend die nuutgestigte politieke platform, Agang, saamgespan om die regering en die ANC te destabiliseer.
Volgens Mail & Guardian het Cosatu-leiers, wat 'n vergadering van die uitvoerende komitee bygewoon het, streng optrede teen Vavi geëis.
"Dit was die moeilikste vergadering wat ek nog ooit bygewoon het. Daar was 'n baie sterk woordewisseling. Vavi was in trane. Hy is van alle kante aangeval. Hy het nie woorde gehad nie," het 'n bron gesê.
– Volg Nuus24 op Twitter
