Vavi kap ANC oor ‘leiers met vuil hande’
2011-01-22 11:00
Die Burger
Stellenbosch - Cosatu het Vrydag (gister) in kwalik bedekte klappe na die ANC in die Wes-Kaap gevra vir ’n algehele ommekeer in leierskap hier.
Die stryd om die provinsiale leierskap tussen ou lede van die vorige ANC leierskorps het reeds mense rondom individue verdeel.
Zwelenzima Vavi, hoofsekretaris van Cosatu, het gesê die vakverbond gaan nie vir die ANC hier vrye spel gee nie.
Vavi was die gasspreker tydens die bekendstelling van die South African Students Congress (Sasco) se Reg om te Leer-veldtog by die Universiteit Stellenbosch.
Hy het onder die luide gejuig van ’n saal vol studente van Maties, die Kaapse Skiereiland Universiteit van Tegnologie, die Universiteit van die Wes-Kaap en die Universiteit van Kaapstad gesê: “Foute is gemaak en dit is tyd om dit reg te stel. Ons wil vordering sien, verandering, en ’n algehele ommekeer in leierskap.”
Vavi het gesê die Wes-Kaap het die hoop vir Suid-Afrika en nierassigheid verteenwoordig, maar nou is die werkersklas verdeel.
“Kom ons bou ’n nuwe ANC in die Wes-Kaap wat beter in staat sal wees om die mense in die provinsie te verenig.
“Ons wil verandering hê en ’n einde aan die vernedering van ons mense wat hul nood in oop toilette moet verlig. Maar die verandering gaan nie gebeur met leiers wie se hande vuil is nie.”
Volgens hom is dit dié tipe leierskap wat die ANC gebring het tot by die punt waar hy nou in die Wes-Kaap is.
Hy het gesê indien daar nie uit die foute van die verlede geleer word nie, sal die jong mense aan die DA afgestaan word.
Volgens hom moet daar gewaak word daarteen dat mense hier gewoond raak aan DA-beheer.
Hy het hom ook by Sasco se beroep om gratis onderrig geskaar en die onderdrukking van swart studente in die hoër onderwysstrukture veroordeel.
Vavi het gesê swart studente moet nie minderwaardig voel nie.
“Hulle gee vir julle D’s sodat julle nie verder vorder met jul studies nie en ander vorder onregverdigbare A’s in. Daarmee probeer hulle om julle jul vertroue in jul intellek te laat verloor.”
Vavi het gesê die toekoms van Suid-Afrika hang af van die veldtog vir gratis onderrig.
- Die Burger