Van Pta na Jozi binne 38 minute!
2011-08-02 09:09
Johannesburg - Die Gautrein tussen Pretoria en Johannesburg se wiele begin vandag rol ná weke van bespiegeling en onderhandelinge tussen die rolspelers.
Motoriste op die N1-hoofweg tussen dié twee stede is al daaraan gewoond om die trein teen 160 km/h by hulle te sien verbyry. Van vandag af gaan treine in spitstyd elke 12 minute verbyskiet.
Die eerste trein is geskeduleer om 05:26 van die Hatfield-stasie in Pretoria na die Rosebank-stasie in Johannesburg te vertrek.
S’bu Ndebele, minister van vervoer, Nomvula Mokonyane, Gautengse premier, en Ismail Vadi, Gautengse LUR vir vervoer, sal die roete amptelik van stapel stuur en van die eerste ritte meemaak.
Die rit duur 38 minute.
Errol Braithwaite, woordvoerder van die Bombela-konsessiemaatskappy wat die Gautrein bou en bedryf, het gesê hulle verwag ’n stormloop van mense wat al maande wag om op die Gautrein te ry, al is dit net ’n kort roete. “Ons het sedert verlede Vrydag duisende Gautrein-kaartjies verkoop. Mense kan eenvoudig nie wag om die Gautrein te ervaar nie,” het Braithwaite gesê.
Daar het Maandag groot opgewondenheid by die Gautrein-stasies geheers.
Annetjie Meyer, wat saam met tientalle ander mense by die Hatfield-stasie tougestaan het vir haar goue kaart, het gesê die stemming was oorweldigend. “Die personeel is almal so vriendelik en hulpvaardig.”
Jack van der Merwe, uitvoerende hoof van die Gautrein-bestuursagentskap, het vroeër gesê ’n geraamde 108 000 mense sal daagliks van die diens gebruik maak. “Ons sal eers ná ’n paar maande weet wat die werklike syfers is en hoeveel mense hoe ver ry. Daar is tien stasies op die lyn en nie al die passasiers gaan van die Hatfield-stasie na die Sandton-stasie ry nie.”
In spitstyd sal daar vyf treine per uur in elke rigting wees. Buite spitstyd sal daar elke 20 minute ’n trein wees en twee treine per uur oor naweke en openbare vakansiedae.
Die lyn tussen die Rosebank- en die Park-stasie sal eers binne die volgende paar maande oopgestel word terwyl ingenieurs die syferwaterprobleem in die treintonnel herstel.
Die begin van die Gautrein-ritte tussen Johannesburg en Pretoria is vertraag nadat gevind is die grondwatertafel tussen die Rosebank- en die Park-stasie is hoër as wat aanvanklik gereken is.
Ndebele het die oopstelling van die lyn tussen Johannesburg en Pretoria verwelkom.
Volg Nuus24 op Twitter.
- Beeld