Van Mandela tot...Malema
2009-08-27 06:58
Londen. – Oudpres. Nelson Mandela het sport gebruik om Suid-Afrikaners te versoen, nou gebruik die ANC dit om rassisme aan te blaas.
Dit was gister die kommentaar in die Britse media oor van die uitsprake uit ANC-geledere – in besonder dié van Julius Malema, leier van die ANC-jeugliga – sedert die herrie rondom die geslag van die atleet Caster Semenya uitgebreek het.
“Lank voordat Semenya weggespring het in daardie ongelooflike 800m-wedloop, is haar saak reeds deur linksgesinde elemente binne die ANC gekaap wat dit as ’n geskenk uit die hemel beskou het om ’n paar teen-wit vlamme te stook,” het die Independent geskryf.
“Haar saak was volmaak vir Malema, wat volgehou het versoeke dat sy getoets word, word uitsluitlik gedoen omdat sy swart is en daar is ’n ontstellende mate van ondersteuning vir hom (Malema) binne die ANC. Mandela op sy beurt het sport gebruik om die rassetydbom te ontlont toe hy in die Springbok-kaptein Francois Pienaar se trui verskyn het.
“Die goue medalje wat Semenya in die 800m vir vroue gewen het en die goue een wat deur die (100% manlike) Mbualeni Mulaudzi verower is, moes ’n wonderlike sportweek vir Suid-Afrika gewees het. Pleks daarvan het die week ’n rilling afgestuur teen die rug van die diegene wat gehoop het die dae van blatante rassisme is verby.”
Die Guardian het berig dat Semenya “verveeld en ongemaklik” gelyk het terwyl politici rondom haar eergister die media gekritiseer en bewerings van seksisme en rassisme gemaak het.
“Malema wou weet waar is die wit Suid-Afrikaners om haar te verwelkom.”
Die blad het in sy kommentaarstuk uitgewys dat Suid-Afrika lankal op soek is na ’n swart sportheldin.
Daar is gister wyd berig oor die ontvangs wat Semenya eergister saam met haar mede-atlete gekry het by hul terugkoms, sowel as pres. Jacob Zuma se besware oor die hantering van Semenya se saak deur internasionale sportowerhede.
- Beeld