Valke sal oor Malema-ondersoek besluit
2011-07-26 19:53
Johannesburg – Die Valke het ‘n dossier van die saak teen Julius Malema, president van die ANC-Jeugliga, ontvang, het McIntosh Polela, woordvoerder, Dinsdag gesê.
“’n Dossier van ‘n saak teen mnr. Malema het by die Valke se kantore aangekom van die Brooklyn-polisiekantoor af,” het hy gesê.
Volgens Polela is die dossier aan die hoof van die eenheid teen kommersiële misdade oorhandig.
“Daardie persoon bestudeer die dossier en ons sal ‘n besluit maak oor of ons ‘n ondersoek sal loods of nie,” het hy gesê.
Afriforum het ‘n klag van korrupsie teen Malema ingedien by die Brooklyn-polisiekantoor in Pretoria nadat daar in City Press en Rapport berig is hy het ‘n geheime trustfonds waarin sakemanne na bewering deposito’s inbetaal.
Die klag is ingedien in terme van die Wet op die Voorkoming en Bestryding van Korrupte Bedrywighede (wetnr. 12 van 2004), het Kallie Kriel, uitvoerende hoof van AfriForum, vroeër in ‘n verklaring gesê.
Die ANCYL het Maandag geantwoord op die berigte en gesê “Die ANCYL-president is oop en gereed vir ondersoeke deur die SARS (Suid-Afrikaanse Inkomstediens) en enige ander wetstoepassers”.
Die leierskap van die liga het gesê die trust is geen geheim nie en word vir welwillendheidsdoeleindes gebruik.
Luidens die berig is Malema die enigste trustee van dié geheime trust.
- Volg Nuus24 op Twitter
- SAPA