Valke ondervra sanger in bedrogsaak
2010-02-25 14:17
Johannesburg - Die Valke het Dinsdag die Kwaito-ster Mandoza ondervra in verband met 'n bedrogsaak waarby een van sy vriende betrek word.
Supt. Musa Zondi, woordvoerder van die Valke, het gesê Mandoza, wie se regte naam Mduduzi Tshabalala is, is ondervra om te hoor wat hy weet oor die bedrogsindikaat.
Dít volg na agt mans, waaronder Mandoza se vriend, Nkululeko Bobo Mncube, en buurman, Mzwandile Sibanda, verlede Donderdag in hegtenis geneem is ná hulle eiendom en motors met vervalste identiteitsdokumente gekoop het.
Mncube is die eienaar van die Mini Cooper waarin Mandoza beseer is ná die motor onlangs teen 'n boom gebots het.
Mandoza was in die agtersitplek van die motor. Die bestuurder het glo verdwyn.
Dié Mini Cooper is een van die motors wat deur die bedrogskema gekoop is.
Zondi het gesê die Valke stel nie belang in die ongeluk nie.
"'n Gespesialiseerde misdaadeenheid ondersoek nie ongelukke nie. Ons ondersoek georganiseerde misdaad en bedrog is 'n georganiseerde misdaad," het hy gesê.
"Ons het hom (Mandoza) gevra of hy iets weet van die skema of dat die eienaar van die motor daarby betrokke is. Ons glo hy het oopgemaak. Ons is tevrede met sy antwoorde."
Zondi het gesê die Valke glo nie dat Mandoza by die sindikaat betrokke is nie.
"Hy het saamgewerk en gesê hy sal help met enige inligting."
Zondi het gesê hulle ondersoek bedrog waar die sindikaat gesteelde of geskepte identiteite gebruik om lenings vir eiendom en voertuie te kry en dan spoorloos verdwyn.
– Sapa