Valke gryp Malema se vriend
2013-01-31 07:07
Johannesburg – Boy Mamabolo, 'n voormalige vriend van die voormalige jeugligaleier Julius Malema, is in hegtenis geneem vir bedrog, het die Valke Woensdag gesê.
"Ja, hy is nou net [Woensdag] in hegtenis geneem," het kapt. Paul Ramaloko, woordvoerder van die Valke, gesê.
Die aanklag van bedrog hou verband met Mamabolo se voorsitterskap van die geografiese namekomitee in Limpopo.
Mamabolo, 'n vurige ondersteuner van pres. Jacob Zuma, sal Donderdag in die Polokwane-landdroshof verskyn.
Geen verdere inligting is bekend gemaak nie.
Mamabolo was onlangs in 'n stryd gewikkel met Malema.
Hy het na bewering gedreig om die oorskot van Malema se ma, Mahlodi Malema, op te grawe en dit voor sy ouma se huis in Seshego te strooi.
“Hierdie keer wil ek jou wys dat ek meer brutaal is, en Mahlodi uit haar graf opgrawe en haar voor [jou ouma se huis] neerlê. Jy het baie slegte dinge aan my gedoen,” het die boodskap gelees.
Die saak is Dinsdag voorlopig van die rol geskrap.
Die oorsprong van die beledigende SMS wat hy na bewering aan die geskorste leier gestuur het, moet eers bevestig word, het brig. Hangwani Mulaudzi gesê.
“Hierdie [die saak se terugtrekking] is hangende die uitslae van die plaaslike kriminele rekordsentrum.”
Mulaudzi sê dis noodsaaklik om vas te stel of Mamabolo die boodskap gestuur het. Die saak sal na die hof teruggestuur word sodra die uitslae bekend is.
– Volg Nuus24 op Twitter
- SAPA
