Valke grafstil oor Malema-lasbrief
2012-09-21 15:23
Johannesburg – Die Valke wou Vrydag nie kommentaar lewer oor berigte dat 'n lasbrief vir Julius Malema, geskorste leier van die ANCYL, uitgereik is nie.
“Die Valke reik nie lasbriewe uit nie, so ons lewer nie kommentaar daaroor nie,” het McIntosh Polela, woordvoerder van die Valke, gesê.
Op ‘n vraag oor of die eenheid beplan om Malema in hegtenis te neem, het hy gesê: “Selfs as ons beplan om hom in hegtenis te neem, sal ons nie vir julle sê nie.”
City Press het Vrydagmiddag berig dat 'n lasbrief vir Malema se inhegtenisname uitgereik is.
Die koerant het berig dat Malema na verwagting volgende week op aanklagte van geldwassery, korrupsie en bedrog in ‘n hof in Pretoria of Polokwane sal verskyn.
Malema se prokureurs het die nasionale vervolgingsgesag en die Valke volgens dié berig vroeër gevra om hom nie in hegtenis te neem nie, maar om vir hom te sê waar en wanneer om in die hof te verskyn.
Malema het die afgelope week weer gesê hy sal in die hof verskyn as hy aangekla word.
Die saak hou verband met Malema se Ratanang Familietrust en sy aandeelhouding in On-Point Engineering, ‘n maatskappy wat miljoene gemaak het uit tenders van die regering in Limpopo.
Meer inligting volg.
– Volg Nuus24 op Twitter
- SAPA
