Valke bekyk sluipmoord
2011-11-14 06:52
Pretoria – Die polisie se elite-ondersoekeenheid, die Valke, is betrokke by die ondersoek na Chanelle Henning (26) se sluipmoordenaars.
Beeld het verneem “dit is net ’n kwessie van tyd” voordat dié twee mans agter tralies is.
’n Bron na aan die ondersoek het gesê die polisie het “goeie inligting” wat hulle opvolg en “ons gaan hulle binne die volgende week of twee vastrek”.
Die polisie het Saterdag twee identikits uitgereik van twee mans wat Henning vermoedelik Dinsdagoggend voor haar seun, Benjamin (5), se kleuterskool in Faerie Glen, in die ooste van Pretoria, doodgeskiet het.
Ao. Annabelle Middleton, polisiewoordvoerder, het gesê verskeie mense wat die mans vóór Henning se moord gesien het, het eergister bymekaar gekom om saam identikits van die moordenaars op te stel. Dié mans is reeds Maandag voor die Morning Star Montessori, waar Benjamin skoolgaan, opgemerk.
Henning het ook Maandag by haar ouers, Ivan Saincic en sy vrou, Sharon, gekla dat sy agtervolg word.
Die motorfietsryers is Dinsdag sowat 40 minute voordat Henning geskiet is ook voor die skool gesien waar hulle haar vermoedelik ingewag het.
Toe Henning by die skool wegtrek, het hulle aan haar bestuurskant verbygery en haar deur haar ruit geskiet.
Haar motor het sowat 350 m van die skool tot stilstand gekom waar sy dood is.
Middleton het gesê die een verdagte het ’n snor, is tussen 35 en 40 jaar oud, sowat 1,7 m lank, is maer en het ’n ligte vel. Die ander verdagte het nie ’n snor nie, is tussen 50 en 55 jaar oud, sowat 1,86 m lank, het ’n ligte vel met baie plooie en is middelmatig gebou met ’n boepens. Albei is wit.
Hulle het op ’n motorfiets gery wat soortgelyk aan ’n Kawasaki Ninja of Honda-motorfiets is. Die motorfiets was swart of donkergrys.
Die twee mans het leer-motorfietsklere gedra wat al oud lyk, asof dit baie gedra is.
’n Roudiens word vanmiddag vir Henning in Hartbeespoort gehou.
– Volg Nuus24 op Twitter
- Beeld