Vakbonde in weermag dalk verbode
2010-06-13 10:00
Rapport
Kaapstad - Die doodsklok kan lui vir vakbonde in die weermag indien die Wysigingswetsontwerp op Verdediging, wat tans voor die parlementêre portefeuljekomitee oor verdediging dien, aanvaar word.
Vakbonde in die weermag is lankal ’n brandende kwessie tussen soldate en die departement van verdediging, met verlede jaar se muitery by die Uniegebou in Pretoria wat die vonk in die kruitvat verskaf het.
Die aanloop tot die kwessie is dat die konstitusionele hof bevind het ’n verbod op vakbonde in die weermag is ongrondwetlik.
Dit was Donderdag by die sitting van die portefeuljekomitee duidelik dat die ringkoppe in sowel die weermag as die departement van verdediging (tans nog onder burgerlike beheer) opdrag het om nie in die openbaar te sê hulle is teen vakbonde in die weermag nie.
“Mens weet nooit waar jy aangehaal word nie,” het ’n verteenwoordiger van die departement se regsafdeling gesê, en ’n verteenwoordiger van die staatsregsadviseur was ewe versigtig.
David Maynier, DA-LP, het die vraag oor ’n verbod op vakbonde reguit gestel, wat tot ’n uiterse katvoetlopery deur die weermag gelei het.
Andrew Mlangeni, ANC-LP en veteraan van die Rivonia-verhoor wat selde ’n wag voor sy mond sit, was egter uitgesproke teen vakbonde.
“Laat ek dit reguit stel. Ek is teen vakbonde. Wat as ons oorlog toe gaan en ’n vakbond besluit om nie deel te neem nie?” het hy gevra.
’n Klein verdere tafereel in die groeiende stryd om inligting oor die weermag vir die publiek beskikbaar te hou, het hom ook afgespeel.
Maynier het gevra dat ’n onlangse verslag oor onder meer arbeidsverhoudinge in die weermag aan die portefeuljekomitee beskikbaar gestel word sodat hulle ingeligte besluite kan neem.
Mnyami Booi, ANC-LP en voorsitter van die portefeuljekomitee, het vervolgens daarop aangedring dat Mpumi Mpofu, aangewese sekretaris van verdediging, die inligting aan die komitee beskikbaar stel.
Mpofu het egter gesê sy sal haar laat lei deur die besluit van die minister van verdediging, me. Lindiwe Sisulu, hieroor.
Twee ander kwessies kom in die wetsontwerp ter sprake. Eerstens bepaal dit wie almal in die opperbevel van die weermag dien.
Tweedens maak dit voorsiening vir die versterking van die reserwemag, wat tans sowat 27 000 lede het, deur werkgewers te verplig om werknemers toe te laat om aan oproepinstruksies gehoor te gee, hoewel daar ook appèlprosedures is.
Volg Nuus24 op Twitter
- Rapport