Vakbonde: 'Die regering lieg'
2010-08-10 14:29
Pretoria – Volgens verskeie vakbonde vertel die regering leuens as hulle sê dat hul nie die 8.6% loonverhoging kan bekostig nie.
“Hulle het die Wêreldbeker-sokkertoernooi gehad. Hulle het geld en dan verwag hulle van ons om vir peanuts te werk,” het Merlyn Mjoni, ‘n stakende onderwyseres van Garankuwa, tydens Dinsdag se stakings in Pretoria se middestad gesê.
Mjoni was deel van ‘n groep lede van die Suid-Afrikaanse Demokratiese Onderwysersunie (Sadou) wat Dinsdag aan die staatsdiens-staking deelgeneem het.
Volgens Boitumelo Ramahlaha, polisiebeampte, was die regering se aanbod van ‘n R10 verhoging in behuisingstoelae eenvoudig nie genoeg nie.
“Die regering moet by hulle beloftes hou. Hulle het nou die geld na afloop van die Wêreldbeker-sokkertoernooi. R10 gaan my nie gelukkig maak nie,” het Ramahlaha gesê.
Vakbonde eis ‘n 8.6%-loonverhoging terugwerkend tot 1 April en behuisingstoelae van R1000.
Die regering bied ‘n 7% verhoging aan en R630 behuisingstoelaag.
Altesaam 150 000 betogers word in Pretoria verwag, waar ’n memorandum aan die minister vir die staatsdiens en administrasie, Richard Baloyi, oorhandig gaan word.
Cosatu verteenwoordig sowat 1,3 miljoen werkers in die staatsdiens.
Volg Nuus24 op Twitter.
- SAPA