Vakbond looi Nestlé
2009-10-02 08:46
Johannesburg - Die Food and Allied Workers’ Union (Fawu) het Nestlé se "skandalige" melkaankope van Grace Mugabe se plaas, met veragting verwerp.
Katishi Masemola, sekretaris-generaal van Fawu het 'n beroep op Nestlé gedoen om Zimbabwiërs om verskoning te vra.
"Fawu verwerp Nestlé se melkverskaffing van 'n plaas wat Mugabe se gesin met geweld van sy oorspronklike eienaars gevat het."
"Ons doen 'n beroep op Nestlé om die eerbare ding te doen en Zimbabwiërs om verskoning te vra vir dié sakepraktyk, as dit nie heeltemal onwettig is weens die sanksies wat op pres. Robert Mugabe geplaas is nie."
Nestlé moes van beter geweet het, het Masemola gesê.
"Ons is in kontak met ons Zimbabwiese kantore en leiers van die internasionale vakbondfederasie om die reaksie van Nestlé te monitor en om te kyk hoe hulle die situasie herstel."
"Indien nie, sal ons drastiese aksie teen die maatskappy neem."
Nestlé Zimbabwe het Donderdag aangekondig dat hy nie langer besigheid met mev. Mugabe se suiwelplaas sal doen nie.
Volgens Robin Tickle, woordvoerder van Nestlé se hoofkantoor in Switserland, was Zimbabwe se suiwelbedryf in Februarie op die rand van ineenstorting, berig Beeld.
Die Suiwelraad van Zimbabwe kon nie langer melk koop by Gushungo Dairy-landgoed en sewe ander plase nie.
“Ons het dus besluit om hierdie melk tydelik te koop, anders sou dit lei tot ’n verdere verswakking in kosvoorraad in Zimbabwe. Vandag het die Suiwelraad ons ingelig dat hy nou weer in staat is om self hierdie melk te koop,” het hy gesê.
Tickle het vroeër volgehou die maatskappy oortree nie Switserse of Zimbabwiese wette nie, hoewel die Mugabes op die Europese Unie en die VSA se sanksielys is weens magsmisbruik en die skending van menseregte.
Die volle omvang van pres. Mugabe se persoonlike plaasvergrype het egter nou eers aan die lig begin kom.
Volgens die Britse Telegraph het hy ’n plaasryk van minstens vyf eiendomme vir homself opgebou.
Die Switserse kosmaatskappy is gedreig met ’n internasionale boikot nadat dit die naweek aan die lig gekom het hy koop tot ’n miljoen liter melk per jaar by die Gushungo Dairy-landgoed, sowat 48 km noord van Harare.
Internasionale menseregte-groepe en Suid-Afrikaanse kerklui het die afgelope week druk op die maatskappy uitgeoefen.
"In die lig van die onlangse omstredenheid oor ons verhouding met die Gushungo Dairy-landgoed, glo ons dat dié aankondiging ons langtermyn verbintenis aan Zimbabwe reflekteer," het die maatskappy in 'n verklaring gesê.
Sapa
Lees meer hier oor ons lesers se opinies oor dié aangeleentheid.