Vakbond: Pasiënte moet 'onderhandel' by hospitale
2010-08-20 12:08
Kaapstad – Pasiënte wat lewe en dood situasies in die gesig staar moet met betogers “onderhandel” om hospitale se grense oor te steek, het ‘n vakbond Vrydag gesê.
Die verklaring deur die National Education, Health and Allied Workers' Union (Nehawu) in die Wes-Kaap kom ná stakende werkers in ander provinsies Donderdag verhoed het dat siek mense die hospitale binnegaan.
Suraya Jawoodeen, Nehawu Wes-Kaap se provinsiale sekretaris, het Vrydag in ‘n verklaring gesê dat die vakbond Kaapstad se Groote Schuur, Tygerberg en GF Jooste hospitale “heeltemal gesluit” het.
Sy het gevra dat lede van die gemeenskap wegbly van hierdie en ander dienslewering-gebiede.
“Diegene wat in situasies van lewe en dood verkeer moet toegang tot die terrein met ons hoofde by die betogings onderhandel,” het sy gesê.
“Ons vra verskoning vir enige ongerieflikhede wat deur ons aksie veroorsaak word en nooi die gemeenskap uit om by ons aan te sluit by Groote Schuur Hospitaal, GF Jooste en Tygerberg.”
Sy het bygevoeg dat betogers ook die departement van binnelandse sake en die departement van arbeid, sowel as verskeie howe en regeringskantore in die provinsie gesluit het.
Volg Nuus24 op Twitter
– Is jy op een of ander manier geraak deur stakings? Stuur jou foto's of storie aan ons.
- SAPA