Vakante poste in onderwys vertraag dienslewering
2010-09-27 08:22
Johannesburg - Die opdeling van die nasionale departement van onderwys in een vir basiese en een vir hoër onderwys en opleiding het die afgelope jaar tot vakante poste in sekere afdelings gelei wat die pas van dienslewering verstadig het.
Luidens die onderwysjaarverslag van 2009-’10 wat vandeesmaand bekend gemaak is, was van die uitdagings in algemene onderwys ’n onvermoë om begrotings te bestee. Dit het meegebring dat die provinsies die geld op ander prioriteite bestee het.
In sommige provinsies is te min geld vir algemene onderwys toegeken om ander agterstande uit te wis, terwyl hulpbronne wat aan skole voorsien is, nie maksimaal benut is nie.
Luidens die verslag is geen vordering gemaak met die ontwikkeling van finansieringsnorme vir inklusiewe onderwys nie weens kapasiteits- en begrotingsbeperkings.
Teen einde Maart vanjaar was daar 1137 poste in die departement waarvan net 918 gevul was.
Boonop het die departement ook ’n relatief hoë omset van personeel gehad.
Die onvermoë van die departement om geskikte gekwalifiseerde personeel te lok, het boonop tot ’n situasie gelei waar personeel konstant van spesifieke gebiede na ander ontplooi moes word.
Die kapasiteitsprobleem is ook vererger deur die onvermoë om van onderpresteerders ontslae te raak weens ingewikkelde prosedures wat gevolg moet word.
In die departement van hoër onderwys is ook kapasiteitsprobleme waar 57 poste nog gevul moet word.
Die verslag toon dat die departement die afgelope jaar 99,97% van sy begroting bestee het indien die geoormerkte bedrag van R524 miljoen vir werkboeke uitgesluit word. Dié bedrag is eers in November verlede jaar vir die projek opsy gesit.
Die verslag toon dat ondanks kapasiteitsprobleme die departement ook heelwat suksesse behaal het.
Vordering is onder meer met voorsiening van water en sanitasie aan skole gemaak.
Van die 751 skole wat water moes kry, is dié werk by 485 afgehandel. Van die 567 wat sanitasiegeriewe moes kry, is dié werk by 430 voltooi.
Wat die verskaffing van elektrisiteit aan skole betref, het 430 van die 1436 dit gekry sedert Oktober verlede jaar daarmee begin is.
Teen einde Maart vanjaar was daar 1137 poste
in die departement waarvan net 918 gevul was.
- Die Burger