'Vaardigheidskrisis' kos regering R24 mjd.
2013-01-25 07:01
Pretoria – Agt nasionale departemente het R24,6 miljard oor drie jaar bestee aan konsultante, het die adjunk-ouditeur-generaal, Kimi Makwetu, Donderdag gesê.
Dít was 74% van die R33,5 miljard wat nasionaal aan konsultante bestee is, het Makwetu aan joernaliste in Pretoria gesê.
"Daar is 'n vaardigheidskrisis. Waar hulle nie vaardighede in die openbare sektor het nie, word die vaardighede uit die privaatsektor gewerf.
"Tot watter mate kry ons waarde uit hulpbronne van die privaatsektor?"
Makwetu het 'n mediakonferensie gehou oor die ouditeur-generaal se prestasie-oudit wat in agt nasionale departemente gedoen is. Hy het ook gekyk na 124 kontrakte met diensverskaffers.
Die departemente van korrektiewe dienste, verdediging, omgewingsake, gesondheid, polisie, landelike ontwikkeling en grondhervorming, vervoer en waterwese is uit 42 nasionale departemente gekies.
Luidens die verkorte oudit-uitkomste het die departement van verdediging R10,4 miljard vanaf 2008/09 tot 2010/11 bestee aan konsultante. Dit was die hoogste van die agt departemente.
Al 27 kontrakte by die departement van korrektiewe dienste, het probleme gehad.
"Die aard van hierdie beduidende tekortkominge is kommerwekkend," het Makwetu gesê.
Die departemente van omgewingsake en waterwese het ook 'n groot aantal swakhede gehad.
Makwetu het gesê die departement van gesondheid was die uitsondering, met suksesse op sommige gebiede. Dié departement het ook die minste aan konsultante bestee.
Die departemente is gekies op grond van die ouditeur-generaal se evaluering van moontlike swakhede in die gebruik van konsultante en bestedingstendense.
"Die besluit is gebaseer op historiese probleme en diegene wat die meeste geld spandeer," het Makwetu gesê.
– Volg Nuus24 op Twitter
- SAPA
