Vaalrivier glo erg besoedel
2012-02-23 09:00
Johannesburg – Huiseienaars by Miljoenêrsdraai (Millionaire’s Bend) is woedend vir die departement van waterwese omdat die Vaalrivier vir 10 km, tot naby die Barragebrug, soos “’n massiewe groen tapyt” lyk weens riool.
Altesaam 300 beeste in die Vrystaat drink glo daagliks dié rioolwater, omdat daar geen ander vars water in die omgewing is nie.
Só het Colin Diab, inwoner van dié welgestelde buurt, vandeesweek in ’n brief aan Marius Keet, senior bestuurder van watergehaltebestuur in die departement van waterwese, geskryf.
Diab skryf in die brief, wat Volksblad onder oë gehad het: “... ek praat namens baie woedende en teleurgestelde eienaars van huise langs die Vaalrivier”.
Van die inwoners meen die Vaalrivier Barrage is nou ’n “tweede Hartbeespoortdam”.
Diab vra aan Keet waarom sy departement nie bewus is van die blou-groen alge wat hul rivier “versmoor” nie? Hy wil ook weet waarom daar nie waarskuwingsborde langs die rivier opgerig word om mense teen die giftige water te waarsku nie.
“Wat doen julle heeldag, terwyl ons Vaalrivier vol rioolafval is so ver as wat die oog kan sien?
“Ons huise se waarde het geval, omdat dit langs ’n rioolrivier staan. Hierdie water – wat hier by ons voorstoepe verbyvloei – is rioolafval, maak nie saak hoeveel verskonings julle uitdink nie.”
Diab skryf ’n ski-kampioenskapstoernooi, waaraan verteenwoordigers van 11 lande deelgeneem het, is verlede naweek in die Vaalrivier gehou en “niemand” het hulle gewaarsku teen die alge in die water nie.
“Is dit nie die departement van waterwese se plig om internasionale deelnemers, wat ons water binnegaan, te waarsku as dit gevaarlik is nie?”
Diab sê almal langs die rivier is ontsteld omdat die watervoëls nou ook geen skoon water het om te drink nie.
“Voëls is nie deur die Almagtige geskape om rioolafval te drink nie.”
Keet het gesê die departement het onmiddellik – nadat hy Diab se brief ontvang het – ’n span uitgestuur om ondersoek in te stel. Die span moet aanstaande week terugvoering gee.
Volgens Keet is daar meer as 22 rioolsuiweringsaanlegte in die opvangsgebied van die Barrage en nie almal funksioneer behoorlik nie.
Oor waarskuwingsborde het Keet gesê dit is nie sy departement se mandaat nie. “Ons waarsku mense op ’n ad hoc-grondslag. Soos die water natuurlik nóú lyk, is dit dodelik om daarin te swem.”
Greg Mulzack, woordvoerder van Rand Water, het gesê dit is ook nie hul mandaat om mense te waarsku om nie die Vaalrivier se water te gebruik nie. Hy het beklemtoon dit ís waterwese se werk.
Diab het gesê só word die rivierbewoners ook van bakboord na stuurboord gestuur en niemand wil verantwoordelikheid vir die gif in die water aanvaar nie.
Diab sê hy meen die Vaalrivier-ekostelsel het nou ’n keerpunt bereik en stel nou selfs gifgasse in die atmosfeer vry.
Volg Nuus24 op Twitter
- Volksblad