VSA-gesin huis toe ná Tafelberg-tragedie
2010-06-14 10:20
Kaapstad - Die gesin van die Amerikaanse tiener wat na sy dood geval het op Tafelberg is op pad terug na hul huis in Texas.
Michael Ryan Berisa (14) was saam met sy ouers en 12-jarige broer op besoek in Suid-Afrika om die Wêreldbeker-sokkertoernooi by te woon.
Die voorval het Saterdagmiddag plaasgevind. Na bewering het die gesin met ‘n kabelkar na die kruin van Tafelberg gery, waarna hulle ’n staproete gevolg het.
Hulle het vermoedelik die Smuts-voetslaanroete gevolg en die meer as 5 km na Skeleton Gorge afgelê. By dié ravyn word daar met twee kettinglere na onder geklim, waarvandaan die roete na die Nasionale Botaniese Tuin Kirstenbosch lei.
“Op pad van die een leer na die volgende het Michael aan ’n boomtak vasgehou om oor die afgrond na die vlak rivier onder te kyk.
“Die tak het egter gebreek en Michael het sowat 20 m ver geval,” het Kogalien Moodley van die soek-en-reddingsorganisasie Wilderness gesê.
IOL het Maandagoggend berig dat die gesin nou besig is met reëlings om terug te keer na hul tuisland. Michael Ryan se lyk sal ook terugvervoer word na sy tuisdorp.
Volgens die eienaar van die gastehuis waar die gesin oorgebly het, gaan dit nie goed met hulle nie. Hulle ontvang glo egter baie goeie bystand van nooddienspersoneel en ander reddingswerkers.
Lees meer hier.
Volg Nuus24 op Twitter.