VS-boere verloor tot R80m weens veediefstal
2011-06-30 20:58
Bloemfontein – Vrystaatse boere verloor jaarliks ‘n geskatte R80 miljoen weens veediefstal, het Vrystaat Landbou Donderdag aan ‘n oorsigtelike komitee van die regering gesê.
Henk Vermeulen, uitvoerende hoof van Vrystaat Landbou, het gesê dít impliseer ook ‘n verlies van R11 miljoen rand in BTW vir die staat.
Desondanks het ‘n polisie-afvaardiging wat gevra is om verslag te lewer hieroor voor dieselfde oorsigtelike komitee aangedui dat hulle nog nie in ‘n posisie is om die mees onlangse statistiek oor veediefstal met die publiek te deel nie.
Die polisie-afvaardiging het die komitee gevra om die syfers in kamera aan te hoor en het gevra dat die media gevra word om te gaan, aangesien die minister van polisie, Nathi Mthethwa, nog nie die mees onlangse misdaadstatistiek aangekondig het nie.
Dié versoek is toegestaan.
Vermeulen het vroeër voor die komitee getuig daar word vermoed dat sindikate ‘n “enorme” rol in veediefstal in die provinsie speel.
Die Vrystaat het die grootste verliese – 19 persent – beleef, vergeleke met ander provinsies.
Volgens Vermeulen het dit ‘n negatiewe impak op werksgeleenthede in die provinsie.
Kobus Breytenbach, woordvoerder van Vrystaat Landbou Wet en Orde, het gesê die lae hoeveelheid mense wat vasgetrek en skuldig bevind word aan hierdie misdade, frustreer boere.
“Daar is nie genoeg mense (polisiebeamptes) en voertuie om die werk te doen nie.”
Hy het gesê sommige boere rapporteer ook nie al die veediefstal nie.
Vrystaat Landbou het politici gevra om meer munisipale kampe vir gesteelde- en wegloperdiere op te stel. Sulke kampe is bykans niebestaande in Vrystaatse munisipaliteite.
- Volg Nuus24 op Twitter
- SAPA