VN: Zuma argitek vir Afrika Vigs-strategie
2009-12-01 12:38
Pretoria - Michel Sidibe, uitvoerende direkteur van die Verenigde Nasies se vigsagentskap (UNAIDS), sê pres. Jacob Zuma is die argitek wat die toekoms van MIV/vigs regoor die kontinent kan herskryf.
Sidibe het Dinsdag tydens Wêreldvigsdag-vieringe in Pretoria gesê: "Meneer president, jou teenwoordigheid hier vandag is 'n teken van jou toewyding aan jou persoonlike leierskap".
Hy het gesê Zuma moenie tyd mors om die MIV/vigs-epidemie aan te spreek nie.
"Ons kan nie bekostig om nog 'n oomblik te mors nie."
Sidibe het gesê verlede jaar het twee miljoen mense regoor die wêreld aan MIV/vigs gesterf terwyl 15 miljoen wag vir behandeling.
Hy het die regering se nasionale strategiese plan om nuwe MIV-infeksies teen 2011 te halveer en te verseker dat 80% toegang tot behandeling het, geloof.
"Dié besluit moes lankal gemaak word, maar dit is nie te laat nie. Jy is die argitek."
Van die mense wat verlede jaar dood is, was 1,9 miljoen mense van ontwikkelende lande en 1,4 miljoen van die Afrika-kontinent.
"Vigs is 'n epidemie van ongelykheid. Wat jy vandag hier doen sal die storie van MIV/vigs regoor Suid-Afrika skryf of herskryf," het Sidibe gesê.
– Sapa