Lindley-plaasmoord: saak uitgestel
2010-12-06 12:03
Bloemfontein - Die saak teen ses mans wat van die plaasmoord op die Potgieter-gesin van Lindley in die Vrystaat beskuldig word, is Maandag uitgestel.
Die landdroshof op Lindley het die saak tot 13 Desember uitgestel vir verdere ondersoek.
Boere van Lindley en ‘n groep VF+-lede het vroeër Maandag buite die landdroshof op dié dorp betoog voordat die mans sou verskyn.
Die ses mans is in hegtenis geneem in verband met verlede week se moord op die Potgieter-familie op ‘n plaas buite Lindley.
Attie Potgieter (40), sy vrou, Wilna (36), en hul driejarige dogter Willemien is verlede week op hul plaas vermoor. Dit het geblyk dat Potgieter doodgesteek is. Sy vrou en dogter is blykbaar geskiet.
Die leier van die VF+, Pieter Mulder, was buite die hof terwyl partylede plakkate geswaai het wat vra vir die herinstelling van die doodstraf.
“Ons is hier om ons woede en frustrasie te toon,” het Mulder gesê.
“Om watter rede sal ‘n mens ‘n twee-en-‘n-halfjarige baba doodmaak? Dit is moeilik om hierdie anders as ‘n daad van rassisme te beskou.”
Mulder het gesê ‘n verdere frustrasie is dat die regerende ANC nog nie ‘n woord oor dié misdaad gerep het nie. Hy het gesê die land se leiers moet sulke moorde in die openbaar veroordeel, ongeag wie die slagoffers is.
Die ANC-regering moet wakker skrik en plaasaanvalle as ‘n prioriteitsmisdaad verklaar, nes onlangs met transitorooftogte en moorde gedoen is, het Mulder gesê.
- Volg Nuus24 op Twitter
- SAPA