VF+ bal vuis vir Pretoria
2010-02-02 15:06
Johannesburg - "Massa-protesoptogte" sal tydens die 2010 Wêreldbeker-toernooi opruk as die regering Pretoria se naam verander.
Pieter Mulder, leier van die VF+ het Dinsdag gesê die naamsverandering van Pretoria na Tshwane deur die ANC-regering is onderduims en polities naïef.
"Dink die ANC regtig dat dit moontlik is om die naam van Suid-Afrika se hoofstad in die stilte te verander sonder vurige opposisie?"
Brian Sokutu, woordvoerder van die ANC, het Mulder se reaksie fel gekritiseer.
"Hulle is nie net onverantwoordelik nie, maar onpatrioties."
Mulder het gesê die naam "Pretoria" is "internasionaal bekend" en dat 'n verandering "grootskaalse verwarring onder buitelandse sokkergeesdriftiges sal veroorsaak wat nou sokkerwedstryde in Tshwane moet bywoon."
Hy het gesê die VF+ oorweeg regsaksie en beloof om dié saak direk met pres. Jacob Zuma op te neem.
Sokutu het gesê die naamsveranderinge word in die regsraamwerk gedoen en is deel van die ANC se agenda vir transformasie.
Die burgerregte-inisiatief AfriForum het beloof om "elke denkbare wetlike stap" te neem om te verseker dat Pretoria sy naam behou.
Lulu Xingwana, minister van kuns en kultuur, het Tshwane gebruik as benaming vir Pretoria in ‘n onlangse uitgawe van die Government Gazette.
'n Mediakonferensie is Donderdag gekanselleer oor die "tegniese aspekte" in die dokument.
Die departement van kuns en kultuur het Dinsdag in 'n verklaring gesê hy sal die naamsverandering van Pretoria as 'n "geografiese kenmerk" terugtrek.
"Die ministerie van kuns en kultuur het beveel dat meer werk deur beamptes gedoen word oor dié saak," lui die verklaring.
– Sapa