Universiteite word fabrieke – Jansen
2010-09-11 15:05
Johannesburg - Universiteite het “fabrieke” geword wat “klaargemaakte produkte” produseer, sê prof. Jonathan Jansen, rektor van die Universiteit van die Vrystaat.
Jansen het die jaarlikse N.P. Van Wyk Louw-gedenklesing Donderdagaand by die Universiteit van Johannesburg gelewer en gepraat oor die veranderde rol van intellektuele by universiteite.
“Daar is ’n stille revolusie aan die broei in ons universiteite sedert die vroeë 1990’s. ’n Revolusie wat die aard van hoër onderwys en die vooruitsigte van demokrasie verander het.”
Hierdie “revolusie” het volgens Jansen daartoe gelei dat studente nie meer vrae vra nie, hulle net gaan studeer om later finansieel te kan oorleef, die universiteite hul toespits daarop om meer studente te kry eerder as om op individue se onderrig te fokus.
Die revolusie het ook beteken dat universiteite niks minder as fabrieke geword het nie en dat dit deesdae net die “speelgrond” vir voormalige parlementêre politici geword het.
Dit is nie waaroor dit by ’n universiteit behoort te gaan nie. “Soveel as wat dit universiteite se plig is om die waarheid te praat, so ook is dit hul plig om oplossings vir probleme te vind.”
Hy het verwys na die “wiele wat afgekom het” ná 1994 en verwys na korrupsie, skandale, diefstal, omkopery en dat pres. Thabo Mbeki deur “woedende lede van sy eie party” verwyder is. “As jy in Afrika die koning eet, bly jy honger,” het Jansen gesê.
Hy sê dié slegte gedrag ná 1994 is glad nie iets nuuts nie. “Inteendeel, dit is net ’n voortsetting van die slegte gedrag van die verlede. Ons spoke kom terug om by ons te kom spook,” sê Jansen.
- Volksblad