Universiteite 8% tot 11% duurder
2011-01-15 09:48
Studiegeld aan universiteite het vanjaar met tussen 8% en 11% gestyg en ouers wie se kinders ook van universiteitsbehuising gebruik gaan maak, gaan die hand diep in die sak moet steek.
Navrae aan die Universiteit van Pretoria (UP), Johannesburg (UJ), Noordwes (NWU), die Vrystaat (UV), Stellenbosch (US) en Wits het getoon stygende klasgeld, werkloosheid en ekonomiese toestande dra toenemend daartoe by dat al hoe meer voornemende studente om beurse aansoek doen.
Die gemiddelde stygings by die onderskeie instellings was: UP 8%, UJ 9,8%, US 11%, UV 8,9%, NWU 9% op die Puk-kampus en 9,5% op die Mafikeng-kampus en Wits tussen 8% en 10%.
Koste vir verskillende graadkursusse wissel van universiteit tot universiteit en hang onder meer af van hoe kursusse saamgestel is. Benewens studiegeld moet studente ook voorsiening maak vir aansoek- en registrasiegeld en deposito’s.
Wat verblyf in koshuise betref, verskil dit ook van instelling tot instelling.
By die UJ kos dit gemiddeld tussen R14 600 en R15 330 vir enkelkamers per jaar in ’n koshuis, etes uitgesluit.
By die UP is dit gemiddeld R19 500, by die US is dit R24 010 vir ’n enkelkamer vir mans en R23 450 vir vroue. Dubbelkamers hier kos R19 730 per jaar. Etes is uitgesluit, maar dit kan na gelang van ’n student se behoefte gereël word. ’n Maksimum etepakket van R11 400, wat drie etes per dag sewe dae per week insluit, is beskikbaar.
Koshuisverblyf by die UV is gemiddeld R13 100 per jaar, by Wits is selfbedieningsgeriewe R22 500 per jaar, terwyl koshuise met alle etes sowat R31 900 per jaar beloop.
By die NWU is koshuisverblyf op die Puk-kampus gemiddeld R12 320 per jaar, op die Mafikeng-kampus R11 350 en op die Vaaldriehoek-kampus R12 585.
Die onderskeie instellings se inkomste uit studiegeld is: UP R977 miljoen, UJ R777 miljoen, US R473 miljoen, UV R335 miljoen, NWU R533 miljoen en Wits R700 miljoen.
- Beeld