Unies bult hul staakspiere
2010-08-07 08:01
Beeld
Voldoen aan ons eise of dienslewering sál tot stilstand kom.
Staatsdiensvakbonde het gister met dié reguit boodskap aan die regering hul spiere gebult en bekend gemaak ’n “totale sluiting” in die staatsdiens gaan Dinsdag geld.
Cosatu en die onafhanklike arbeidskoukus (ILC) het op ’n mediakonferensie in Centurion gesê meer as 1,3 miljoen staatsamptenare kan Dinsdag landwyd staak.
“Pretoria en Kaapstad sal tot stilstand kom. Ons sal seker maak daarvan,” het mnr. Mugwena Maluleke, hoofsekretaris van die Suid-Afrikaanse Demokratiese Onderwysersunie (Sadou), namens die vakbonde in die Cosatu-stal gewaarsku.
Vakbonde het die regering se jongste aanbod, wat ’n 7%-salarisverhoging insluit, gister eenparig van die hand gewys.
Die regering sal Dinsdag in ’n memorandum gevra word om binne 24 uur aan vakbonde se eise te voldoen. Gebeur dit nie, is ’n onbepaalde staking onafwendbaar.
Vakbonde eis onder meer ’n 8,6%- salarisverhoging en ’n verhoogde huissubsidie van R1 000 terugwerkend van 1 April.
Stakende staatsamptenare sal Dinsdag aan optogte in Pretoria en Kaapstad deelneem.
Cosatu het voorts gewaarsku hy kan nie waarborg sy lede wat noodsaaklike dienste verrig, gaan vir werk opdaag nie. Dit beteken noodsaaklike dienste soos die polisie, korrektiewe dienste, die weermag, hospitale en howe kan ontwrig word.
Dr. Norman Mabasa, voorsitter van die Suid-Afrikaanse Mediese Vereniging (SAMV), het gister gesê hy weet nie of staatsdokters en -verpleegsters sal staak nie, berig Antoinette Pienaar. “As hulle staak, sal dit ’n ‘wild cat’ (onbeskermde)-optrede wees.”
Mabasa is bekommerd dat ondersteuningspersoneel, soos skoonmakers en portiere, se stakings “reeds oorwerkte” dokters en verpleegsters se werk sal ontwrig.
Mnr. Chris Klopper, voorsitter van die ILC en uitvoerende hoof van die Suid-Afrikaanse Onderwysersunie (SAOU), het gesê vakbonde kan nie daarvan beskuldig word dat hulle onverantwoordelik optree nie.
“Skole is betyds in kennis gestel en onderwysers kan nie verkwalik word omdat hulle hul reg (om te staak) uitoefen nie.”
Klopper het gesê vakbonde het al op 9 Junie ’n dispuut verklaar.
“Ons kon toe begin staak het, maar wou nie die situasie tydens WB 2010 uitbuit nie. Die regering het ons verdraagsaamheid uitgebuit.”
Maluleke het gesê nét die regering kan nou ’n herhaling van 2007 se staatsdiensstaking – die grootste in die land se geskiedenis – voorkom.
Mnr. Richard Baloyi, minister van staatsdiens en administrasie, het by monde van mnr. Dumisani Nkwamba, sy woordvoerder, gesê vakbonde moet aanvaar die jongste aanbod is “regverdig, billik en finaal”.
“Daar sal nie nog ’n aanbod wees nie.”
Nkwamba het gesê dienslewering sal na verwagting “aansienlik” ontwrig word.
“Ons het gebeurlikheidsplanne en sal tydelike kontrakwerkers inspan waar die grootste nood ervaar word. Ons sal die ontwrigting egter net in ’n mate kan beperk.”