Unieleier 'wou saam met kamerade sterf'
2012-08-17 16:42
Johannesburg – Joseph Mathunjwa, president van die Association of Mineworkers and Construction Union (Amcu), wou terugkeer om saam met sy kollegas by Lonmin se Marikana-myn te sterf, het hy Vrydag gesê.
"Ek het vir hulle gesê hulle moet loop... Ek het gepleit, ek het gepleit," het Mathunjwa aan verslaggewers in Johannesburg gesê.
Die trane het oor sy wange gerol terwyl hy meer oor die gebeure vertel het wat tot die dood van 34 betogers naby Rustenburg gelei het.
Hy het gesê werkers het vroeër Donderdag geweier om die gebied te verlaat, en gesê hulle sal aanbly al moet hulle sterf.
"Ons het in ons motors geklim en is daar weg... Ná 'n paar minute het die telefoon gelui [oor die skietery].
"Ek wou omdraai om te gaan sterf saam met my kamerade," het Mathunjwa gesê.
Hy het gesê Amcu-leiers het voor die skietery sonder polisie-begeleiding na die betogers geloop.
"Ek het by hulle gepleit: 'Die skrif is aan die muur, hulle gaan julle doodmaak'," het hy gesê.
Riah Phiyega, die nasionale polisiehoof, het Vrydag in 'n mediakonferensie bevestig dat die sterftesyfer tans op 34 staan. Meer as 78 mense is ook in die voorval beseer, het sy gesê.
Altesaam 259 mense is in hegtenis geneem vir aanklagte van onder andere openbare geweld, moord, poging tot moord, die besit van gevaarlike wapens en opsetlike saakbeskadiging.
"Dit is nie nou tyd vir blameer en vinger wys nie. Dit is 'n tyd vir ons om te rou. Die polisie moes geweld gebruik om hulself teen die groep te beskerm," het Phiyega gesê.
– Volg Nuus24 op Twitter.
- SAPA
