Uitstaande handboeke móét afgelewer word

2012-10-04 15:18

Pretoria – Die Pretoria-hooggeregshof het Donderdag 'n derde hofbevel toegestaan wat die nasionale onderwysdepartement en die departement van onderwys in Limpopo dwing om uitstaande handboeke vir 2012 dringend by skole in die provinsie af te lewer.

Regter Jody Kollapen het ook beslis dat die departement alle handboekaflewerings vir grade 4, 6 en 11 vir die 2013-skooljaar teen 15 Desember afgehandel moet hê.

Die regter sê die departement het misluk met 'n sogenaamde opvang-plan soos wat in twee vorige hofbeslissings vervat is, het RSG berig.

Die nie-regeringsorganisasie Section 27 het 'n hofaansoek in Mei gewen wat die departement verplig het om handboeke af te lewer vir graad R en 10.

Die departemente is beveel om nie later as 17 Oktober aan die hof en Section 27 terug te rapporteer oor wat hulle doen om die spertyd na te kom.

– Volg Nuus24 op Twitter.

- SAPA