Uitspraak kan Malema 'maak of breek'
2011-11-10 08:05
Johannesburg – Politieke ontleders sê die uitspraak van Julius Malema, president van die ANC-jeugliga, se tugverhoor, kan sy politieke loopbaan maak of breek.
Malema en vyf ander beamptes van die jeugliga word daarvan beskuldig dat hulle verdeelheid saai in die regerende party. Die ANC het gesê hy sal om 10:00 'n mediakonferensie hou om die uitslag van die verhoor bekend te maak.
Die ANC het op 30 Augustus die tugverhoor teen Malema begin – die tweede een in 18 maande.
Die eerste dat van die verhoor is gekenmerk deur geweld, waarna ANC-beamptes die verhoor na 'n ander lokaal verskuif het.
Senior ANC-leiers insluitend Winnie Madikizela-Mandela, Tokyo Sexwale en Fikile Mbalula het in Malema se guns getuig.
Op die laaste dag van die verhoor het Malema erken dat hy foute gemaak het.
Intussen is die polisie en die metropolisie op 'n hoë gereedheidsgrondslag in die Johannesburgse middestad.
President- en Sauerstraat is weens sekuriteitsredes teen 07:00 gesluit, het hoofsupt. Wayne Minnaar, woordvoerder van die Johannesburgse metropolisie, gesê.
"Ons beamptes monitor die situasie by Luthuli-huis. Hulle sal vir die res van die dag daar wees."
– Lees meer hier
– Volg Nuus24 op Twitter
– Watter implikasies hou die uitspraak in Malema se tugverhoor vir die ANC as party? Stuur jou mening na terugvoer@nuus24.com.