Uitspraak in Jub Jub-saak uitgestel

2012-10-10 17:57

Johannesburg – Uitspraak in die moordverhoor van die musikant Molemo "Jub Jub" Maarohanye en Themba Tshabalala sal Donderdag in die Protea-landdroshof hervat word.

"Dit was nou al 'n lang dag," het landdros Brian Nemavhidi gesê.

"Ons sal môre (Donderdag) voortgaan."

Nemavhidi het Woensdag bewyse van spesialiste, ontleders, getuies en polisiebeamptes bespreek.

"Beskuldigde nommer een [Maarohanye] het onskuldig gepleit op die 10 aanklagte teen hom," het Nemavhidi gesê.

"Beskuldigde nommer twee [Tshabalala] het ook onskuldig gepleit op die 10 aanklagte teen hom."

Maarohanye en Tshabalala word daarvan aangekla dat hulle op 8 Maart 2010 deur ‘n groep skoolkinders geploeg het terwyl hulle resies in Mdlalose-rylaan in Soweto gejaag het.

Vier kinders het in die ongeluk gesterf en twee ander het ernstige beserings opgedoen.

Maarohanye en Tshabalala staan tereg op vier aanklagte van moord, twee van poging tot moord en roekelose en nalatige bestuur terwyl hulle onder die invloed van drank en dwelms was.

Die families van al ses van die skoolkinders was Woensdag in die hof en het dikwels emosie getoon terwyl Nemavhidi die bewyse van die ongeluk en die oorsaak van die sterftes bespreek het.

Beide die families van die skoolkinders en Maarohanye het hul verligting uitgespreek dat die verhoor tot 'n einde kom.
    
– Volg Nuus24 op Twitter

- SAPA