Uitreik van vervalste rybewyse 'is moord'
2011-10-21 09:47
Johannesburg – Mense wat vervalste of onwettige rybewyse uitreik, maak hulle skuldig aan moord, want hulle laat motoriste wat nie kan bestuur nie op die land se paaie toe.
So het S’bu Ndebele, minister van vervoer, Donderdag op ’n mediakonferensie in Johannesburg gesê.
Ndebele, Ismail Vadi, LUR vir paaie en vervoer, en Tshidi Mfikoe, burgemeesterskomiteelid vir openbare veiligheid, het gesê die probleem gaan op alle vlakke van die regering getakel word.
“Daar is twee soorte rybewyse wat uitgereik word. Die een is ’n vervalsing wat nie op die eNaTIS-stelsel geregistreer is nie en word gewoonlik by sommige bestuurskole gekoop.
Die ander is ’n ‘wettige’ rybewys wat by ’n beampte van ’n rybewystoetssentrum gekoop word en wat wel op die eNaTIS-stelsel geregistreer is,” het Ndebele gesê.
Volgens Vadi het die departement van paaie en vervoer in Gauteng reeds 2 373 rybewyse en professionele bestuurspermitte gekanselleer ná 12 oudits van toetsdokumente en 36 inspeksies van toetssentrums deur die departement van gemeenskapsveiligheid.
Ndebele het gesê 250 000 voertuie gaan elke maand voorgekeer word om rybewyse na te gaan.
“Ons gaan wetstoepassing verskerp om te verseker dat dié probleem landwyd stopgesit word.”
Vadi het gesê die departemente is bewus dat sommige van hul beamptes betrokke is by die onwettige uitreiking van rybewyse.
“Indien ’n wettige rybewys op ’n onwettige manier uitgereik is, is dit deur die hande van een van ons eie.
“Dit is ’n verleentheid en ’n ernstige uitdaging vir ons departemente.”
Vadi het gesê die Valke, onder leiding van genl.maj. Shadrack Sibiya, is besig met ’n intensiewe ondersoek.
“Die Valke en die polisie ondersoek 178 sake in verband met die uitreiking van onwettige rybewyse by toetssentrums, deur verkeersbeamptes en by bestuurskole.
Van dié is 61 direk verbind met lisensietoetssentrums en voertuigtoetssentrums.”
Volgens Vadi is daar bestuurskole wat adverteer: “Rybewyse binne sewe dae gewaarborg.”
“Dit dui aan daar is iets onheilspellend aan die gang.”
Intussen worstel die departement met ’n agterstand van 495 000 aansoeke om rybewyse.
Ndebele het gesê ’n landwye program om leerlinge te leer bestuur gaan van stapel gestuur word om sodoende verdere agterstand te keer.
“Skoolkinders sal die geleentheid gebied word om by skole te leer bestuur.”
Vadi het gesê so ’n stelsel is reeds in Gauteng in werking.
’n 24-uur inbellyn is begin waar mense rybewysbedrog kan aanmeld. Dié nommer is 0800 701 701.
– Volg Nuus24 op Twitter
- Beeld