Uitlek van opnames aan Zuma bly geheim
2011-09-23 08:03
Kaapstad - Dit lyk of Suid-Afrikaners nooit gaan uitvind hoe pres. Jacob Zuma se regspan ’n stel geheime bandopnames bekom het wat deurslaggewend was in die nasionale vervolgingsgesag (NVG) se besluit om hom nie verder te vervolg nie.
Die Burger het op goeie gesag verneem die inspekteur-generaal van intelligensie se ondersoek na die uitlek van dié bandopnames aan Michael Hulley, Zuma se prokureur, is teen einde 2009 afgehandel en niemand gaan vervolg word nie.
“Die hoofstuk is afgesluit,” het ’n ingeligte Donderdag bevestig.
Dit is duister hoe Hulley die bandopnames van die Nasionale Intelligensie-agentskap (NIA) bekom het. Daar is destyds beweer dit is onwettig bekom.
Hulley het sedert April 2009 – toe die NVG besluit het om Zuma nie verder te vervolg nie – hom op die privilegie tussen prokureur en kliënt beroep toe hy oor die oorsprong daarvan uitgevra is.
Zolile Ngcakani, voormalige inspekteur-generaal van intelligensie, het die ondersoekverslag op 30 Desember 2009 aan die parlement se gesamentlike staande komitee oor intelligensie (JSCI) voorgelê.
Luidens die JSCI se verslag vir die boekjaar 2009-’10 wat Donderdag in die parlement ter tafel gelê is, sou dié komitee weer ’n voorlegging oor die ondersoek ontvang het.
Die Burger het egter by verdere navraag uitgevind geen haan het daarna gekraai nie.
Die inhoud van die ondersoekverslag sal waarskynlik nooit bekend gemaak word nie, want die JSCI kan inligting net uitreik ná konsultasie met die staatshoof, wat moet besluit of dit nasionale veiligheid in gevaar stel.
Intussen toon die JSCI se jongste jaarverslag byna R5 miljoen is verkwis op ’n kommissie wat Ronnie Kasrils, oudminister van intelligensie, in 2006 aangestel het om ondersoek in te stel na die hersiening van die land se intelligensieregime. Kasrils het die kommissie se verslag eers in Augustus 2008 ontvang – dit was tóé reeds ’n jaar laat.
Kasrils het egter versuim om die hersieningsverslag aan die JSCI voor te lê en hy het in September 2008 uit die kabinet bedank nadat oudpres. Thabo Mbeki herroep is.
Dr. Siyabonga Cwele, Kasrils se opvolger, het die JSCI later ingelig dié verslag “het geen status in die kabinet nie”. Die vyf mense wat in die kommissie gedien het, onder wie dr. Frene Ginwala, gewese speaker van die parlement, het altesaam R4,9 miljoen ontvang.
Dit blyk voorts uit die JSCI-jaarverslag die intelligensiedienste het van 2006 tot Februarie 2010 minstens drie miljoen selfoon- en landlynoproepe onderskep ingevolge die Wet op die Onderskepping van Inligting en Voorsiening van Kommunikasieverwante Inligting (Rica).
Volg Nuus24 op Twitter.
- Die Burger