Uitkoms kom dalk vir Pelonomi
2011-03-02 09:02
Bloemfontein - Lewensbelangrike toerusting en broodnodige beddens vir die sukkelende Pelonomi-hospitaal in Bloemfontein kan moontlik in die Vrystaatse LUR vir gesondheid, Fezi Ngubentombi, se begrotingsrede vervat word.
Ngubentombi het Maandagaand omstreeks 23:00 dié hospitaal onverwags besoek om onder meer die toestand hier te ondersoek en na dokters en verpleegsters se probleme te luister.
Sy het hier aan Volksblad gesê die besoek is tydig, want nou weet sy voor haar begrotingsrede wat die hospitaal nodig het.
Ngubentombi sal haar begrotingsrede na verwagting einde vandeesmaand op Heilbron lewer.
Hospitaalpersoneel was oningelig oor haar besoek en sy het minstens een werker onkant betrap.
’n Opnameklerk wat ’n uiltjie aan diens geknip het, is Maandagaand uitgevang.
Volgens die LUR was die klerk “vas aan die slaap” toe sy daar aankom.
Ngubentombi het die nuwe uitvoerende hoof van Pelonomi, dr. Joe Khoali, opdrag gegee om tustappe teen die klerk te doen en aan haar daaroor verslag te doen.
Pogisho Phepheng, die klerk, het later aan Volksblad gesê hulle is slegs twee klerke wat Maandagaand aan diens was. Volgens hom het nie een van hulle toe geslaap nie.
Volgens Ngubentombi sukkel die hospitaal ook met ’n verpleegstertekort. Sy het beloof verpleegsterposte sal geadverteer word.
Ook Khoali het personeeltekort as een Pelonomi se probleme uitgewys.
Dr. Julia van der Westhuizen wat in dié hospitaal se ortopedie-eenheid aan diens was, sê sommige pasiënte wag ’n dag of twee of selfs tot drie weke om operasies te ondergaan.
Die baie noodoperasies kry voorkeur en boonop het die hospitaal te min werkende teaters.
Toe die LUR die hospitaal binnekom, het ’n ry mense gewag om ’n dokter te spreek. Sommige pasiënte het selfs op houtbanke in die hospitaal geslaap.
Nobakunjani Ganta van Phahameng, Bloemfontein, wat gebroke Engels gepraat het, het ’n diep wond aan haar linkerhand gehad.
Sy het ure lank gewag voordat sy uiteindelik ná middernag na ’n spreekkamer gebring is.
Sy het in ’n spruit tussen Bochabela en Batho geval en is vermoedelik deur gebreekte glas gesny.
Ganta het die wond met ’n lap toegedraai en die LUR het verpleegsters gevra om dit te verbind om moontlike infeksie te voorkom.
Mense hier was moeg gewag en gefrustreerd en het gesê hulle is ontevrede met Pelonomi se diens.
Ngubentombi het gesê voorkeur word aan noodgevalle gegee en dus word vinniger na sommige pasiënte as ander omgesien.
Ander mense het gesê die hospitaal se diens het baie verbeter.
Klein Precious Khomojong (6) van Koffiefontein ly aan brosbeensiekte (Osteogenesis imperfecta) en was Maandagaand saam haar ouers, Elias en Miemie, in Pelonomi nadat sy haar linkerbobeen in ’n speletjie gebreek het.
Die ouers sê hulle moes al verskeie kere hul kind na dié hospitaal bring.
In die verlede het hulle al 17:00 by Pelonomi opgedaag en kon eers 06:00 die volgende oggend huis toe gaan. Nou word hulle vinniger gehelp. Veiligheidswagte was sigbaar op Pelonomi se terrein.
Vier het by die ingang waggehou en ander het met flitsligte die hospitaalperseel gepatrolleer.
Veiligheid hier is erg gekritiseer nadat ’n vroulike dokterl in Oktober verlede jaar in die vroeë oggendure hier verkrag is.
- Volksblad