Uitgevang! Wreedheid op kamera
2011-05-02 07:56
Pretoria - Polisielede is op kringtelevisie vasgelê terwyl hulle ’n Pretoriase man verskeie kere in die maag geskop, in die gesig geslaan en op sy kop getrap het.
Ná dié aanranding op Theuns Potgieter (33) van Silverton, Pretoria, is hy in hegtenis geneem weens die besit van ’n ongelisensieërde vuurwapen, die rig van ’n vuurwapen en verset teen inhegtenisneming.
Dit is die derde onlangse voorval van polisie-wreedheid nadat Andries Tatane (34) en Jeanette Odendaal (45) weens polisie-optrede dood is.
Potgieter en sy vriend, Hendrik Grobler (35), het voorverlede Donderdag omstreeks 21:00 na ’n vulstasie in Gezina in die Pretoriase Moot, wat deurnag oop, gegaan is om bande te herstel.
Grobler se motor het vroeër die dag twee pap bande gekry.
Potgieter se vuurwapen was agter by sy rug in sy broek ingesteek. Hy het nie sy vuurwapenlisensie by hom gehad nie.
Op die kringtelevisiemateriaal kan ’n mens sien hoe twee mans in siviele drag in ’n wit BMW by ’n petrolpomp stilhou. Kort daarna hou ’n polisievoertuig stil. ’n Polisieman praat met die twee mans in die BMW.
“Ons het met ’n ou gestaan en gesels toe daar die volgende oomblik ’n klomp polisiemanne met vuurwapens op ons toesak,” het Potgieter gesê. “Nog voordat hulle my gevra het, het ek my vuurwapen uitgehaal en op die voertuig se masjienkap gesit. Die polisie het gesê ons moet gaan lê. Ek het my arms opgetel en gaan lê.”
Op die kringtelevisiemateriaal kan ’n mens sien hoe een van die mans in die BMW na Potgieter loop en hom ’n paar keer in die maag skop.
Die man in siviele drag trap op Potgieter se kop en slaan hom met die vuis in die gesig voordat hy hom weer in die maag skop. Tussendeur het ’n polisieman in uniform Potgieter ook geskop.
Nadat Potgieter geboei is, is hy na die Pretoria-Moot-polisiekantoor geneem. Hy is Vrydagmiddag hospitaal toe geneem nadat hy bloed opgegooi het. Hy is Saterdagmiddag ontslaan en het in die selle gebly totdat hy Dinsdag in die Pretoriase landdroshof op borgtog van R2000 vrygelaat is.
Intussen is bevestig hy het wel ’n vuurwapenlisensie.
Kol. Neville Malila, Gautengse polisiewoordvoerder, het gesê dié saak word in ernstige lig beskou en sal intern ondersoek word, “want sulke beweerde gedrag deur polisielede kan nie geduld word nie”.
- Die Burger