UV ontvang internasionale toekenning
2011-01-10 06:52
Bloemfontein - Die Universiteit van die Vrystaat (UV) het ’n internasionale toekenning ontvang.
Die Wêrelduniversiteite-forum (WUF) het die toekenning vir beste praktyk in hoër onderwys vir 2010 aan die UV gedoen.
Volgens Lacea Loader, woordvoerder van die UV, word die toekenning gedoen aan ’n universiteit wat gedurende ’n jaar beduidende maatreëls ingestel het om die instelling te verbeter.
Volgens Loader het die WUF onder meer die volgende uitgelig as redes waarom die UV die toekenning vanjaar gewen het:
* Rasse-integrasie op die UV-kampusse.
* Die herbeklemtoning van ’n akademiese kultuur.
* Die vise-kanselier se prestige studenteprogram om belowende studente te behou.
* Die F1-program van die UV wat 71 studente na top- Amerikaanse universiteite stuur.
* Die hersiening van die voorgraadse kurrikulum om ’n multidissiplinêre aanslag te volg in die benadering van sleutel- maatskaplike probleme.
* Die verhoging van toelatingsvereistes.
* Die toeganklikheid van die rektor, prof. Jonathan Jansen, vir studenteleiers, bestuur, personeel en studente.
* Die bevordering van ’n gees van gesprekvoering deur die internasionale adviesraad van die UV, wat uit sleutelrolspelers en denkers bestaan.
Die ondersteuning van die UV aan 20 erg disfunksionele skole in die Vrystaat, wat die kans verhoog vir swart studente om aan die UV te studeer, is ook uitgewys.
Die WUF het hierdie program as die mees innoverende aangewys.
“Die UV word deur dié prestige toekenning nederig aangemoedig tot hoër hoogtes. Dit is ’n erkenning vir akademiese uitnemendheid en institusionele transformasie.”
Die WUF het in ’n verklaring gesê die UV word beloon vir die wyse waarop die instelling rasseharmonie, studente-sukses en ’n lewendige akademiese kultuur aanmoedig.
Die toekenning word op die WUF se byeenkoms op 14 tot 16 Januarie in Hongkong oorhandig.
Jansen sal nie self daar wees om die toekenning te ontvang nie, maar sal ’n aanvaardingsboodskap stuur wat voorgelees sal word.
- Volksblad