UV-dramastudent verongeluk
2010-08-28 13:16
Bloemfontein - 'n Talentvolle jong akteur en Kovsie-student het vandeesweek in die Noord-Kaap verongeluk.
Heinrich Keogh, ’n student van die departement drama en teaterkuns aan die Universiteit van die Vrystaat (UV), was Woensdagmiddag omstreeks 05:30 in ’n motorongeluk. Keogh was blykbaar saam met sy vriendin, mej. Ilne Fourie, op pad na Calvinia, waar sy haar gewilde verhoogstuk Impi sou opvoer.
Volgens De Beer Cloete, ’n dosent aan die fakulteit, het Keogh se motor van die pad af gery. Toe die motor die gruis aan die kant van die pad tref, het Keogh probeer om die motor weer op die pad te kry.
Hy het beheer verloor en die motor het verskeie kere gerol. Keogh is noodlottig beseer en Fourie het net ligte beserings opgedoen.
Prof. Nico Luwes, hoof van die departement drama en teaterkuns, beskryf Keogh as “’n baie gawe outjie”. Hy was veral gewild vir sy rol as Boer Manie in die verhoogstukke Boer Manie se melk word suur en Boer Manie en die basaar, albei deur Fourie geskryf.
Hy is oorspronklik van Bothaville, maar het in 2004 aan die Hoërskool Sand du Plessis in Bloemfontein gematrikuleer.
Fourie was nie gister vir kommentaar beskikbaar nie en volgens Luwes is sy erg getraumatiseer deur die ongeluk en dood van haar vriend.
Keogh se Facebook-bladsy is oorstroom deur boodskappe van vriende wat ook erg geskok is deur sy dood.
Die lykskouing is gisteroggend afgehandel en sy lyk is na Bothaville gebring.
Volgens voorlopige begrafnisreëlings sal hy Donderdag op die dorp begrawe word.
Die presiese tyd en kerk waar sy begrafnis sal plaasvind, is nog nie beskikbaar nie.
Volksblad kon nie gister kommentaar van Keogh se familie kry nie. Die Noord-Kaapse polisie het ook nie enige inligting oor die ongeluk gehad nie.