Tyd vir suip en slaap is verby, sê Jansen
2010-01-30 10:53
Gert Coetzee
Bloemfontein-Die volgehoue werwing van die beste professore in en van buite die land vir die Universiteit van die Vrystaat (UV), infasering van verpligte klasbywoning en die verpligte publiseer van navorsingswerk deur akademiese personeel.
Dié voorneme is onder die agt voorkeure vir 2010 wat prof. Jonathan Jansen, rektor, gister in sy openingstoespraak uitgestippel het in sy visie om die UV tot die voorste universiteit in die land te ontwikkel.
Nog ’n voorkeur is die aandrang dat buite-agentskappe die diensvoorwaardes van hul UV-werkers verbeter deur hul minimum vergoedingsvlak drasties te verhoog. As dit nie gebeur nie, sal dié agentskappe se tenders nie hernu word nie.
Die UV-personeel en ander belanghebbendes was geesdriftig oor Jansen se mededeling dat 2010 “die jaar is waarin die UV gaan verander”.
Hy het “goeie nuus” voorgehou wat wys dit gebeur reeds. Dit sluit in dat die UV van die “beste professore in die land” gelok het (in reaksie op advertensies vir 25 bykomende professorale poste wat hy verlede jaar aangekondig het). Die kies van suksesvolle kandidate geskied in die volgende twee weke.
Volgens Jansen het hy ook die minister van hoër onderwys, dr. Blade Nzimande, per brief meegedeel die UV is nou die mees geïntegreerde universiteit in die land.
Hy het die voorbeeld voorgehou van die vrouekoshuis Welwitschia, waar verlede jaar net swart studente gebly het.
Toe hy die koshuis weer vanjaar besoek het, was dit ten volle geïntegreer.
Swart en wit bly saam.
Voorts het die meeste UV-koshuise al die 50/50-peil vir integrasie van eerstejaars bereik, die meeste huiskomitees is geïntegreer, en van die beste atlete en hokkiespelers in die land het hulle vanjaar as eerstejaarstudente ingeskryf.
Jansen hoop dit is reeds volgende jaar onnodig om ’n “integrasie-telling” te hou en dat die gemeenskaplike belewenis van “menswees” al is wat saak maak.
Hy het ook ’n modelplan voorgehou van ’n UV waar onder meer geen student ’n klas misloop nie danksy voortreflike onderrig in die klaskamer, en alle senior studente diep agting toon vir eerstejaarstudente in die 23 koshuise.
Oor sy voorkeur vir hoër gehalte-onderrig deur verpligte klasbywoning, het hy gesê die tyd dat studente “suip en laat slaap” is verby. “Die adres daarvoor is Potchefstroom.”
Klasbywoning sal outomaties verbeter as dié drink- en slaap-gewoonte uitgeroei is.
- Die Burger