Twitter help vrou wat met selfmoord dreig
2011-07-31 11:00
Johannesburg - Suid-Afrika se Twitter-gemeenskap het Vrydagaand ’n soekmag van sowat 2 000 mense gemobiliseer om die ma van twee seuns op te spoor nadat sy gedreig het om selfmoord te pleeg.
Die vrou van KwaZulu-Natal, wat as @innov8ive getwiet het, het in haar heel eerste boodskap Vrydag 22:00 op Twitter gevra hoeveel ’n mens moet drink om die moed bymekaar te skraap om ’n slagaar oop te sny.
Later het haar twiets al hoe meer desperaat geraak en ’n prentjie van liefdesteleurstellings, diepe verlies en eensaamheid geskets.
Sy het geskryf: “As jy die ma van jou kinders haat, maak haar seer, los haar, breek haar af, neem hulle van haar weg en isoleer haar. Vat alles weg wat sy liefhet.”
Besorgde “twitterati” het haar dadelik met boodskappe probeer bemoedig.
Kort voor lank was daar ook versoeke dat enigiemand wat haar kan help opspoor, hulp moet verskaf.
Een van dié mense wat haar probeer help het, Harry Dennen, ’n kopieskrywer van Durban, het Saterdag vertel hoe hulle te werk gegaan het.
Nadat hy van haar situasie bewus geraak het, het hy ander Twitter-gebruikers gevra hoe hy kan help.
Iemand het hom laat weet @innov8ive is, volgens die program, in Kingsburgh, naby Amanzimtoti.
Sy huismaat, Rob van der Westhuizen, ken die omgewing goed en die twee is met ’n motor soontoe om haar op te spoor.
“Terwyl Rob bestuur het, het ek Netcare 911 gebel en hulle het goed gereageer. Die eerste adres wat ons probeer het, was verkeerd. Ek het op Twitter vir nog adresse gevra en is nog een aan die oorkant van die rivier gegee.”
Intussen het nog ’n Twitter-gebruiker, @SynStalker, soekgeselskappe begin mobiliseer.
“Toe hoor ons dat iemand @innov8ive se familie opgespoor en haar pa ingelig het,” vertel Dennen.
As jy hoor van iemand wat selfmoord oorweeg, moet jy dadelik iets doen, sê Dennen.
“Omdat jy byna enigiemand op Twitter kan volg, laat dit ’n gemeenskap toe om onmiddellik tot stand te kom, iets wat nie vyf jaar gelede sou kon gebeur nie.
“Dit was regtig interessant om te sien hoe ad hoc-soekgeselskappe binne twee minute gevorm word.”
Volg Nuus24 op Twitter.
- Rapport