Tweede polisielid in ’n week doodgeskiet
2009-10-12 06:52
’n Tweede Pretoriase polisieman is binne ’n week doodgeskiet terwyl hy aan diens was.
Studentekonstabel Mandla Ngwenya (23) is eergister omstreeks 02:00 dood.
Kapt. Charl Scheepers, operasionele bevelvoerder van misdaadvoorkoming by die Brooklyn-polisiekantoor, is verlede naweek in Lynnwood doodgeskiet nadat hy ’n groep vermeende rowers by ’n bouterrein gekonfronteer het.
Volgens konst. Sam Shibambo, polisiewoordvoerder, het die Mamelodi-Oos-polisiekantoor eergisteroggend klagtes van ’n rooftog, bakleiery en aanrandings by ’n sjebien in die omgewing ontvang.
Ngwenya, wat by die Silverton-polisiekantoor gestasioneer was, het onder andere na die toneel uitgegaan.
Die groep van sowat 50 belhamels het die polisie met klippe bestook en weggehardloop. “In die harwar is ’n skoot afgevuur.”
Ngwenya is in die kop geskiet en is op die toneel behandel. Hy was dood by sy aankoms by die hospitaal.
Shibambo het gesê die moontlikheid dat een van Ngwenya se kollegas hom geskiet het, is reeds uitgeskakel.
Komm. Magda Stander, waarnemende nasionale polisiekommissaris, het in ’n verklaring gesê die polisie is “diep bedroef en kwaad” oor die moord.
“Nou is die tyd om te sê tot hier toe en nie verder nie. Ons moet beslissende optrede toon teenoor diegene wat verantwoordelik is vir die aanvalle op en moord van ons helde in blou.”
- Beeld