Tweede man vas vir moord op hoewe
2012-01-29 13:23
Johannesburg – 'n Tweede verdagte is in hegtenis geneem in verband met die moord op 'n man en die aanranding van sy vrou op 'n hoewe naby Brits, het die polisie in die Noordwes Sondag gesê.
Drie vuurwapens is Sondagoggend ten tye van die man se inhegtenisname in sy besit gevind. Een van dié vuurwapens is vermoedelik die moordwapen, het brig. Thulani Ngubane in 'n verklaring gesê.
Frans van der Linden, 57, is verlede Sondag op die hoewe Rashoop, 13 km buite Brits, geskiet. Sy vrou, Elizabeth, is aangerand. Hulle het op die hoewe, wat aan ene Me. Botha behoort, tuisgegaan om vir hulle dogter se troue voor te berei.
Die polisie het die eerste man Donderdag in hegtenis geneem. 'n Selfoon en Van der Linden se motorsleutels is in sy besit gevind. Vier ander selfone, plofstof, 'n skootrekenaar, horlosies en juwele is ook in die man se besit gevind.
Albei verdagtes word ook verbind met 'n rooftog by 'n sake-onderneming. Hulle sal na verwagting Maandag in die Brits-landdroshof verskyn.
– Volg Nuus24 op Twitter.
- SAPA