Tweede kind van gesin pleeg selfmoord
2011-07-06 09:15
Bethlehem - ’n Hegte gesin van dié dorp neem vandag die tweede keer in ’n jaar afskeid van ’n kind wat selfmoord gepleeg het.
J.W. Heymans (24), ’n ywerige sportman en opgeleide plaagbeheer-operateur, is Sondag in die vroeë oggendure by sy ouers se onderneming, Bethlehem-plaagbeheer, dood aangetref waar hy homself glo gehang het.
Heymans se hartseer ma, Tess, ’n bekende sakevrou en lid van Bethlehem se Rotariërs, wou nie met Volksblad praat nie. Heymans se jare lange vriendin, Natasha Stander, wou ook nie kommentaar lewer nie.
Stander het op ’n Facebook-groep ter nagedagtenis van Heymans haar liefde uitgespreek.
“Ek mis jou my ander helfde. Ek sien nog hoe jy vir jouself kwaad raak op die gholfbaan. Dankie dat jy my gevat het om na die sterre te kyk op jou flat se dak, jy het belowe as dit warmer word, sal ons weer. Nou sal ek moet opkyk na jou toe en sien hoe helder jy vir my blink.”
Heymans se ouer suster, Jenny Truter (36) van Fouriesburg, is op 15 Junie verlede jaar dood. Sy het ook selfmoord gepleeg. Haar man, Hanno Truter, sê hy glo nie JW het ooit sy suster se dood verwerk nie.
“Hulle was baie na aan mekaar. Jenny se dood het ’n groot impak op hom gehad.”
Truter sê sy kinders, Daníelle (11) en Charl (9), gaan hul oom baie mis.
Heymans was ’n ywerige sportman wat graag fiets gery en gholf en krieket gespeel het.
Hy het vir die Bethlehem-Dorp-krieketklub gespeel.
Okkie Botha, hoof van die Hoërskool Witteberg waar Heymans in 2005 gematrikuleer het, het die gewilde Heymans as ’n “oulike seun” beskryf.
“JW was altyd ’n vrolike, joviale soort kind – altyd vol grappies. Hy het ’n groot vriendekring gehad. Almal het van hom gehou.”
Heymans word oorleef deur sy pa, Hannes, ma, Tess, en broers, Regardt, Gerhard en Jaco.
Die begrafnis is vandag om 14:00 uit die Nederduitsch Hervormde kerk in Barry de Kok-laan, Bethlehem.
Sers. Majang Mosupa, polisiewoordvoerder, sê ’n geregtelike doodsondersoek word gedoen.
- Volksblad