Tweede 'hartbaba' sterf
2011-11-04 17:02
Johannesburg – ‘n Babaseuntjie van Port Elizabeth wat met sy hart buite sy bors gebore is, is Vrydagoggend dood, het die Oos-Kaap se departement van gesondheid gesê.
“Hy het om 03:30 vanoggend gesterf,” het woordvoerder Sizwe Kupelo gesê.
Die seuntjie is verlede Maandag by die huis gebore en sy 17-jarige ma is daarna na die Dora Nzinga-hospitaal in Zwide gehaas.
Hy het verlede Dinsdag ‘n noodoperasie ondergaan. ‘n Stuk vel is om die hart geplaas om dit te beskerm terwyl verdere toetse gedoen is, het Kupelo gesê.
Die toestand, wat as Pentalogie van Cantrell bekendstaan, kom slegs voor in een uit elke miljoen babas.
Dokters het Maandag besluit dat geen verdere toetse op hom gedoen sal word nie, aangesien sy toestand te ernstig is.
Van die hartkamers is nie ontwikkel nie en van die are wat bloed uit die kop en nek moet vervoer, ook nie. Dit beteken dat bloed in dié gedeelte opdam.
Kupelo het bygevoeg dat niks vir die baba gedoen kon word nie, gebaseer op die kliniese analise.
Die baba het in die hospitaal gebly en het mediese sorg ontvang tot sy dood.
Ashleigh Louw is verlede jaar in ‘n soortgelyke geval in Johannesburg met haar hart buite haar bors gebore.
Sy is sowat twee maande later in die Chris Hani-Baragwanath Hospitaal in Johannesburg dood.
– Volg Nuus24 op Twitter