Twee vroue in Parow vermoor
2010-06-15 07:54
Kobus Pretorius, Die Burger
Kaapstad - ’n Dubbele moord het gister die gemeenskap van Parow geruk toe twee jong vroue onderskeidelik verwurg en gesteek is by ’n huis in Weimarstraat.
Die een vrou (20) het saam met verskeie ander mense, onder wie haar ma en suster, in die huis gewoon. Haar ma het omstreeks 16:15 op die toneel afgekom.
Die ander vrou, vermoedelik 19, is van Boston in Bellville.
Ao. Jacques Mostert, polisiewoordvoerder in Parow, het gisteraand bevestig ’n 26-jarige man, wat op die perseel woon, is in polisie-aanhouding vir ondervraging.
Mostert het gesê een van die vroue is in die sitkamer gevind.
Hy het die binnekant van die huis as “deurmekaar” beskryf.
Forensiese patoloë het omstreeks 20:20 op die toneel aangekom en sou volgens Mostert die res van die aand die toneel fynkam.
Mostert kon nie die name van die oorledenes bekend maak nie en het gesê die 19-jarige vrou, wat op haar maag gevind is en nie omgedraai kon word voordat die patoloë die toneel ondersoek het nie, se identiteit moet nog bevestig word.
Volgens bure is die moord die derde voorval in twee weke in die straat.
Daar was verlede week ook glo twee inbrake in die straat.
Die bure het egter gesê hulle voel nie bang nie en is nie juis besorg oor hul veiligheid nie.
“Ons is al gewoond aan allerhande verdagte voorvalle en karakters in die gebied. Dit is vir ons ’n alledaagse ding,” het ’n vrou gesê.
’n Buurman wat al 20 jaar in die straat bly en die gebied baie goed ken, het gesê moord is nie iets wat eintlik hier voorkom nie.
“Ek het nooit gedink so iets sal hier op my voorstoep gebeur nie,” het hy gesê.
- Die Burger