Twee vermis in see
2012-01-19 15:59
Johannesburg – Soektogte is Donderdag hervat vir twee mans wat vermoedelik in die Kaapstad-omgewing verdrink het, het die Nasionale Seereddingsinstituut (NSRI) gesê.
Igshaan Ariefdien (27) het Woensdag by Mnandi-strand vermis geraak en Jerome Booysen (35) by die Milnerton-strandmeer.
Die mans se name is deur die stad se ramp-risikobestuursentrum bekend gemaak.
Volgens Craig Lambinon, woordvoerder van die NSRI, het Ariefdien, van Lost City in Mitchells Plain, saam met ‘n vriend lyfplank gery toe hy in sterk strome vermis geraak het.
Sy vriend kon daarin slaag om terug te swem na veiligheid.
Booysen, van Kaapstad, het probeer om twee vroue, waaronder een sy niggie was, te red. Hy het in die proses self in die moeilikheid beland. Die vroue het daarin geslaag om na die strand te swem.
Polisieduikers en NSRI-Tafelbaai sal Donderdag voortgaan met die soektogte.
– Volg Nuus24 op Twitter
- SAPA